Tahir Gözəl: Rəqibləri Qarabağla səfər oyunlarından çəkinir

"Qarabağ"ın prezidenti Tahir Gözəl bu gün jurnalistlərlə görüşüb. Azerisport.az xəbər verir ki, Ağdam klubunun prezidenti öncə son dövrlər cəbhə bölgəsində baş verən hadisələrdən bəhs edib:

"Bu yaxınlarda cəbhə bölgəsində ciddi hadisələr baş verdi. Neçə əsgərimiz şəhid oldu. Biz öz torpaqlarımızda oynamaq istəyirik. Hər şey yaxşı olacaq. Komanda üzvləri ilə görüşdüm, söhbət etdik. Qarşıdakı avrokubok mövsümünün bizim üçün daha böyük önəm daşıdığını qeyd etdik. Ötən illərdəki uğurlarımızı təkrarlamalıyıq. Belə bir kritik məqamda Avropada uğur qazanmağımız vacibdir".

Gözəl növbəti turda qarşılaşacaqları "Neftçi" ilə oyuna da toxunub: "Neftçi" böyük tarixə malik klubdur. Onların hazırda düşdüyü vəziyyətə görə təəssüf hissi keçirirəm. İstərdim ki, bu komanda yenidən çempionatın liderləri sırasına qayıtsın. "Qəbələ"nin də işləri son dövrlər yaxşı getmir. Yaxşı məşqçiləri var. Biz Qurban Qurbanovla da bu barədə söhbət etmişik".

"Yaxşı azarkeşlərimiz var. Rəqiblər bizimlə səfər oyunlarından çəkinirər. Biz bu intizamı, sabitliyi qorumalıyıq ki, avrokuboklarda rəqabətə davam gətirə bilək".

"Komanda üzvləinə dedim ki, böhran hər yerdə var. Onlar çox yaxşı şəraitdə hazırlıq keçirlər və heç bir çətinlik hiss etmirlər. Dedim ki, sizə yalnız məşq etmək və oynamaq qalır. Avrokuboklarda da öz güclərini göstərməlidirlər".

Gözəl transfer planlarından da söz açıb: "Transfer məsələsində biz Qurban Qurbanova sərhəd qoymamışıq. O, öz seçimlərində sərbəstdir. Kimi seçəcəyinə yalnız özü qərar verir. Reynaldo da tam əvvəlki formasını bərpa etsəydi, lap yaxşı olardı. Klubumuz ondan çox şey gözləyir".