Zaur Svanadze: Azarkeşlər maraqlı və gərgin mübarizənin şahidi olacaqlar
Məlum olduğu kimi, Topaz Premyer Liqasının 30-cu turunda “İnter” səfərdə “Kəpəz”in qonağı olacaq. Azerisport.az xəbər verir ki, paytaxt klubunun baş məşqçisi Zaur Svanadze klub saytına açıqlamasında hazırlıq prosesi barədə danışıb və oyun haqqında fikirlərini bildirib:
“Oyuna ciddi hazırlaşırıq. Bizi “Kəpəz”lə çətin oyun gözləyir, bu komanda doğma divarlar arasında yaxşı oyun sərgiləyir. Düşünürəm ki, azarkeşlər maraqlı və gərgin idman şəraitində keçəcək mübarizənin şahidi olacaqlar. Əlavə etmək istəyirəm ki, Kamran Ağayevlə Nizami Hacıyev zədəlidirlər, Abbah Hüseynovun isə mikro-zədəsi var və onun oyuna çıxması sual altındadır. Bildiyiniz kimi, Rauf Əliyev artıq komandayla məşq edir və “Kəpəz”lə oyunda ilk 18-liyə salınacaq. Qarşıdakı oyunu buraxacaq oyunçularımızdan biri də Sezar Meza Kollidir. Sarı vərəqə limitini dolduran paraqvaylı futbolçu Gəncəyə yollanmayacaq”.
