Rövşən Hüseynli: Onlardan belə oyun gözləmirdim
Futzal üzrə Azərbaycan yığmasının qapıçısı Rövşən Hüseynli dünya çempionatına vəsiqə urğunda Hollandiyaya qarşı keçirilmiş cavab pley-off oyunundan (4:4, ilk oyun - 5:1) sonra azerisport.az saytının suallarını cavablandırıb.
- Matçla bağlı fikirləriniz?
- Oyun bizim gözlədiyimizdən də çətin alındı. Hollandiyanın belə müqavimət göstərəcəyini gözləmirdik. Onlar ilk oyunla müqayisədə bu dəfə çox əla oynadılar. Aydın məsələdir ki, rəqibin itiriləsi heç nəyi yox idi. Buna baxmayaraq, qarşılaşma heç-heçə bitdi və biz cütün qalibi olduq.
- Sizdən cavab matçında da böyük hesablı qələbə gözlənildiyi halda, buna nail ola bilmədiniz. Niyə?
- Deməzdim ki, biz də böyük hesablı qələbə arzulayırdıq. Amma qələbə qazanmağı istəyirdik. İstənilən halda hər şeydən önəmli olan komandamızın dünya çempionatına vəsiqəni təmin etməsidir. Buna necə nail olmağımız artıq ikinci plandadır.
- İlk oyunda 5:1 hesablı qələbənin futzalçılarımızda arxayınlıq yaratdığını demək olar?
- Bəli, həmin qələbənin cavab görüşündəki çıxışımıza təsiri oldu. Hətta cavab matçında hər dəfə hesabda önə keçməyimiz də bizi arxayınlaşdırırdı.
- Matçın gedişində dünya çempionatına vəsiqəni əldən verəcəyinizi düşünmürdünüz?
- Xeyr. Sadəcə, biz öz imkanlarımızdan 50 faiz aşağı çıxış etdik. Buna görə də hesab 4:4 oldu. Bu heç də yaxşı olmadı. Bakıda tam fərqli oynamalı idik. Əfsuslar olsun ki, matça tam yaxşı köklənə bilməmişdik.
- Bəs oyundakı atmosferlə bağlı nə deyə bilərsiniz?
- Atmosfer super idi. Bizi dəstəkləməyə gələn hər kəsə təşəkkürümü bildirirəm.
- Matçın sonunda aqressiv görünürdünüz. Yəqin ki, qol buraxmaqdan bezmişdiniz...
- Çünki oyun mən gözlədiyim kimi getmirdi. Hollandlara oynamaq imkanı verirdik. Matçın sonlarında rəqib qapımız qarşısında təhlükəli vəziyyətlər yaratmağa başlayanda ümumiyyətlə özümdn çıxdım.
- AFFA rəhbərliyi sizi oyundan sonra təbrik etdi?
- Bəli. Qarşıdakı oyunlarda bizə uğur da arzuladılar. Amma hələ nə qədər mükafat alacağımızı bilmirik.
- Millimizdən DÇ-də hansı nəticəni gözləyirsiniz?
- DÇ-nin startına hələ çox vaxt qalır. Hələ ki, nail olduğumuz bu tarixi uğura sevinirik. Ümid edirəm ki, DÇ-də də yaxşı nəticələr qazanacağıq.
