Şəhriyar Rəhimov: İnterlə oyuna ancaq qələbə üçün çıxacağıq

"Kəpəz"in müdafiəçisi Şəhriyar Rəhimov Topaz Premyer Liqasının son turlarında üzləşdikləri uğursuzluqlara münasibət bildirib. Azerisport.az saytına açıqlamasında o, bunları söyləyib:

"Qarabağ" bizimlə oyunda layiqli qələbə qazansa da (4:0), heç kim bizim belə böyük hesabla uduzacağımızı gözləmirdi. Biz AZAL və "Qarabağ"a məğlubiyyətləri mümkün qədər tez unutmalıyıq. Qarşıda "İnter"lə oyun var. Tam olaraq bu görüşə köklənməliyik. Komandamızda heç bir problem yoxdur. Sadəcə, son iki oyun bizdə alınmadı. Futbolda belə hallar olur. Komandamıza inamım çox böyükdür. "İnter"lə görüş bizim üçün böyük əhəmiyyət kəsb edir. Həm də evdə oynayacağıq. Azarkeşlərimizin də dəstəyi sayəsində meydana ancaq qələbə üçün çıxacağıq".