Orxan Qurbanlı: Biz erməni futbolçuları öz oyunumuz və qələbəmizlə məyus etdik
Latviyanın "Dauqava" klubunun yarımmüdafiəçisi Orxan Qurbanlının azerisport.az saytına müsahibəsi
- Latviya kubokunun 1/4 finalında "Metta/LU" üzərində qazandığınız qələbə (2:0) barədə təəssüratlarınız necədir?
- Çox ağır oyun oldu. Xoşbəxtlikdən biz ələ düşən qol şanslarından yaxşı yararlandıq. Bu qələbə bizim üçün çox vacib idi.
- Yarımfinala vəsiqə qazandınız. Yəqin ki, hədəf finala çıxmaqdır?
- Bu mərhələdə mübarizənin bir oyundan ibarət olduğunu nəzərə alsaq, qələbə qazanmağımız önəmli idi. Şübhəsiz ki, finala çıxmaq istəyirik. Allah eləsin ki, buna nail olaq.
- Yarımfinalda sizi "Babite" - "Yelqava" cütünün qalibi ilə oyun gözləyir. Hansı ilə oynamaq istəyərdiniz?
- Fərqi yoxdur, kim düşürsə, düşsün. Bizim öz hədəflərimiz var. Onun üçün də mübarizə aparırıq.
- Son oyunda Mirabdulla Abbasovun ötürməsindən sonra qol vurdunuz...
- Bəli, elədir. O, cərimə meydançasına yaxşı ötürmə etdi. Mənə sadəcə, topu tora qovuşdurmaq qalırdı.
- Həmin qolu əsgər salamı ilə qeyd etməyi öncədən planlaşdırmışdınız?
- Matçdan öncə belə bir fikrim var idi. Düzünü deyim ki, mən də, Mirabdulla da qol vuracağımız halda hansısa formada dəstək olmağı çox istəyirdi. Xoşbəxtlikdən bu arzumuz gerçəkləşdi. Latviyada olsaq da, ürəyimiz vətənlədi.
- Bu matçda rəqibin heyətində erməni futbolçular da var idi. Bu, sizin üçün əlavə motivasiya yaradırdı?
- Bəli, bilirdik ki, rəqibin heyətində erməni futbolçular var. Bu da bizim üçün əlavə motivasiya demək idi.
- Matçın gedişində onlarla hansısa probleminiz olmadı?
- Xeyr, heç bir problem olmadı. Biz öz oyunumuz və qələbəmizlə rəqibi məyus etdik.
- Müqavilə ilə məxsus olduğunuz "Neftçi"nin son turda "Xəzər Lənkəran"a 1:0 hesabıyla qalib gəldiyi oyuna baxdınız?
- Matçın videoyazısına baxdım və bu qələbəyə çox sevindim. Uşaqları bu qələbə münasibətilə təbrik də etdim.
- Bu tempdə davam etsəniz, Azərbaycan yığmasının baş məşqçisi Robert Prosineçkinin diqqətini çəkə biləcəyinizə ümid edirsiniz?
- Fikrimcə, əsas milliyə dəvət almaq həm mənim, həm də Mirabdulla üçün tezdir. Öncə biz U-21 yığmamıza düşmək barədə düşünməliyik. Təbii ki, hər ikimiz nə vaxtsa əsas millinin də şərəfini qorumağı arzulayırıq. Sadəcə, bu barədə danışmaq hələ tezdir.
