Rizvan Fərzəliyev: Bizi heç-heçə və ya minimal hesablı məğlubiyyət qane etmir

Futzal üzrə Azərbaycan yığmasının kapitanı Rizvan Fərzəliyev dünya çempionatına vəsiqə uğrunda Hollandiyaya qarşı keçiriləcək cavab pley-off matçı öncəsi azerisport.az saytının suallarını cavablandırıb.

- Cavab matçına necə hazırlaşmısınız?
- Aprelin 7-dən toplanışdayıq. Oyuna tam hazırıq. İlk oyunda yaxşı üstünlük əldə etdik. Buna baxmayaraq, hələ cütün taleyinə aydınlıq gəlməyib. Şanslar əllinin əlliyədir. Dünya çempionatında oynamaq istəyiriksə, cavab matçına da ciddi köklənməli və qalib gəlməliyik.

- Yığmamızın bütün üzvləri ilk oyundakı 5:1 hesablı qələbənin elə də böyük üstünlük olmadığını deyir. Amma bir komanda öz meydanında 1:5 hesabıyla uduzursa, ondan səfərdə hansı təhlükəni gözləmək olar ki?
- Üstünlüyümüz pis deyil. Sadəcə, meydana arxayın çıxmamalıyıq. Düzdür, minimal hesablı uduzmaq da bizə sərf edir. Amma meydana belə fikirlərlə çıxmaq olmaz. Qələbə qazanmaq lazımdır.

- Tino Peres ilk oyunda qol vəziyyətlərindən yaxşı yararlandığınızı deyir. Cavab görüşündə necə olacaq?
- İstərdim ki, cavab matçında da bu baxımdan çətinliklə üzləşməyək. Ev oyununda komandamız daha çox həyəcanlı olacaq. Bu da qol vəziyyətlərindən yaxşı yararlanmağa problem yarada bilər.

- Yığmamızın çox emosional qapıçısı var - Rövşən Hüseynli. Ev oyunundakı atmosfer ona mənfi təsir etməz ki?
- O, artıq böyük turnirlərdə çıxış edib və təcrübəsi yetərincədir. Baxmayaraq ki, hələ gəncdir. Belə vəziyyətlərdə necə davranmaq lazım olduğunu bilir. Onu dəstəkləmək lazımdır.

- Yığmanın ən təcrübəli üzvlərindən birisiniz. Karyeranızda bir neçə dəfə dünya çempionatına vəsiqə qazanmağa yaxın olmusunuz. Özünüz həyəcanlı deyilsiniz?
- Həyəcan olmalıdır. Bu da daha çox məsuliyyətdən irəli gəlir. Bizi heç bir heç-heçə və ya minimal hesablı məğlubiyyət qane etmir. 100 faizlik nəticə qazanmaq istəyirik.