Saşa Yunisoğlu: Zirədən 4 qol buraxmağımızda özümüz günahkarıq
"Rəvan"ın müdafiəçisi Saşa Yunisoğlu Topaz Premyer Liqasının 29-cu turu çərçivəsində "Zirə"yə 0:4 hesabıyla uduzduqları oyunu şərh edib. Azerisport.az saytına açıqlamasında o, bunları söyləyib:
"Futbolda hər oyuna yaxşı köklənmək və güclü olduğunu isbatlamaq üçün çalışmaq lazımdır. Bizim gənc futbolçularımız çoxdur. Hansı ki, onların Premyer Liqa təcrübəsi demək olar ki, yoxdur. "Neftçi" üzərindəki qələbədən sonra uşaqların əksəri elə düşünürdü ki, istənilən rəqibə qalib gələ bilərik. Fikrimcə, "Zirə" ilə oyuna istənilən səviyyədə köklənə bilməmişdik. Meydana çox arxayın çıxmışdıq. Buna görə də kobud səhvlər buraxdıq ki, bu da qollarla nəticələndi. Belə məğlubiyyətə görə özümüz günahkarıq. Buna baxmayaraq, "Zirə"ni qələbə münasibətilə təbrik edirəm. Biz isə artıq növbəti görüşlər barədə düşünməliyik. Biz elitada qalmaq uğrunda mübarizə aparırıq. Bizə xal və xallar qazanmaq çox vacibdir".
