Pərdis Fərcad-Azad: Kim deyir ki, orada penalti yox idi?
"Sumqayıt"ın hücumçusu Pərdis Fərcad-Azad Topaz Premyer Liqasının 29-cu turu çərçivəsində "Qəbələ"yə qarşı keçirdikləri oyunu şərh edib. Azerisport.az saytına açıqlamasında o, 1:1 hesablı heç-heçə ilə bağlı bunları söyləyib:
"Mən öncə vətən uğrunda şəhid olan əsgər və hərbçilərimizin ailələrinə dərin hüznlə başsağlığı vermək istəyərdim. Onlara səbr diləyirəm.
"Qəbələ" ilə oyuna gəlincə, çətin matç alındı. Rəqibin problemlərinin olduğunu bilirdik. Onlar bu görüşdə qələbə qazanmaq istəyirdilər. Amma biz də yaxşı oynadıq və xal qazana bildik".
Pərdis hesabı bərabərləşdirdiyi penalti epizodunun mübahisəli olmasına da münasibət bildirdi: "Kim deyir ki, orada penalti yox idi? Penalti var idi. Rəqib mənim ayağıma zərbə endirmişdi. Cərimə meydançasından ən kiçik toxunuş da penalti üçün yetərlidir. Odur ki, penalti qərarı doğru idi. Daha necə qayda pozuntusu olmalı idi ki, penalti təyin olunsun? Şadam ki, qol vurdum, komandamız məğlubiyyətdən xilas ola bildi".
