Namaşko: Bakıda bizi futboldan uzaqlaşdıra biləcək vəziyyət yaranmayıb
AZAL-ın moldovalı qapıçısı Stanislav Namaşko ölkəsinin mətbuatına müsahibə verib. Azerisport.az sizi həmin müsahibə ilə tanış edir.
- Dağlıq Qarabağda baş verən hadisələr sizi futboldan soyutmur?
- Düzü, siyasi məsələlərdən danışmaq istəməzdim. Döyüşlər Bakıda yox, başqa regionda gedir. Burada heç bir problem hiss olunmur. Mən özümü təhlükəsizlikdə hiss edirəm. Demək olar ki, bizi futboldan uzaqlaşdıra biləcək hansısa situasiya yaranmayıb. Həm də mən bu hadisələri yaxından izləmirəm. Siyasət siyasət olaraq qalır və idmanla heç bir əlaqəsi yoxdur.
- Uğurlu mövsüm keçirirsən. AZAL-ın da yaxşı sürət yığdığı hiss olunur...
- Komandamız ötən il də ev oyunlarında uğurlu çıxışedirdi. İndi AZAL altıncı pilləyə yüksəlib. Bu, bütöv komandanın zəhmətinin, əziyyətinin nəticəsidir. Mövsümün əvvəlindəki çıxışımızla indiki arasında fərq var. Bu da yayda komandamızın demək olar ki, sıfırdan qurulmasından irəli gəlir.
- İştah diş altındadır. Avrokuboklara düşmək istəyiniz var?
- Hələ qarşımızda belə bir hədəf yoxdur. Qarşımıza elitada qalmaq hədəfini qoymuşdular. Amma yedikcə, iştah da artır. Avrokuboklara düşməyimiz daha yaxşı olardı. Biz indi layiqli oyun sərgiləyirik. Təbii ki, avrokuboklardan da heç birimiz imtina etmək istəmirik. Lakin qarşımıza "Qarabağ" və "Qəbələ" kimi yüksək hədəflər qoyulmayıb.
- Azərbaycanda daha nə qədər çıxış etmək fikrindəsən?
- Mayın 21-də son turun oyunları keçiriləcək. Müqaviləmin müddəti başa çatacaq. Amma necə olacağını hələ bilmirəm. Təklif olsa, baxacağam. Bu gün üçün heç bir təklif yoxdur.
- AZAL da müqavilənin müddətini artırmaq təklifi etməyib?
- Hələ danışığımız olmayıb. Fikrimcə, hər şeyi mövsümün sonunda müzakirə edəcəyik. Hələ sakitlikdir. İndi bizə ancaq məşq etmək, oynamaq lazımdır.
- Azərbaycan qalmağın əleyhinə deyilsən?
- Artıq bu ölkəyə alışmışam, çempionatı yaxşı tanıyıram. Bu üzdən də özümü burada çox rahat hiss edirəm. Buradan təklif olsa, qalardım. Olmasa, fərqli təkliflərə baxmalı olacağam. Karyeramı Azərbaycanda davam etdirmək arzum var. Amma nəyin necə olacağını mayda biləcəyik.
- Azərbaycanda futbolun səviyyəsinə necə qiymət verərdin?
- Səviyyə heç də pis deyil. Yığma komanda son dövrlər yaxşı çıxış edir. "Qarabağ"la "Qəbələ" Avropa Liqasının qrup mərhələsinə vəsiqə qazanmşdd. Turnir cədvəlində çox böyük sıxlıq var.
