Mahmud Qurbanov: Milli komandamız heç vaxt danışılmış oyuna getməyib
Azərbaycan yığmasının məşqçisi Mahmud Qurbanov Qazaxıstana qarşı yoxlama matçının nəticəsinin öncədən razılaşdırıldığı barədə yayılan xəbərlərə münasibət bildirib. Azerisport.az saytına açıqlamasında o, bunları söyləyib:
"Bu, şayiədən başqa bir şey deyil. Qazaxıstanda nə baş verdiyini başa düşmürəm. Ola bilər ki, bunu Qazaxıstan futbolunu tənqid edən şəxslər yazıblar və onlar bu komandanın uğuruna kölgə salmaq istəyirlər. Amma Azərbaycanı bu işə niyə qatdıqlarını anlamıram. Halbuki, bundan söhbət də gedə bilməz. Azərbaycan yığması heç vaxt danışılmış oyuna getməyib. Hətta oyun özü də göstərdi ki, heç bir danışılmış oyundan söhbət gedə bilməz. İndi qazaxların niyə belə yazdığını anlamıram. Hazırda ölkəmizdə hər kəsi işğal altında olan torpaqlarımızla bağlı yaranmış vəziyyət düşündürür. Mən də həyatını itirən bütün hərbçilərimizin ailələrinə, yaxınlarına dərin hüznlə başsağlığı verirəm. Bütün fikrimiz, ürəyimiz onlarladır".
