"Azərbaycandakı AÇ-də iştirak mənim idman arzumdur"

Azərbaycanın U-16 yığmasının sabiq hücumçusu, hazırda Almaniyanın U-17 yığmasının şərəfini qoruyan Renat Dadaşov özü barədə danışıb, eləcə də Bakıda keçiriləcək AÇ-2016-dakı hədəflərindən söz açıb. Azerisport.az xəbər verir ki, o, öncə bunları dilə gətirib:

"Azərbaycandakı Avropa çempionatında çıxış etmək mənim ən böyük idman arzularımdan biridir. Babamla nənəm artıq Almaniya yığmasının şərfini alıblar. Onlar mənim yığma komandada necə oynamağımı görmək istəyirlər".

Dadaşov Almaniya U-17 yığmasında keçirdiyi 10 matçda 10 qol vurub. Öz güclü cəhətlərindən danışarkən Renat bunları söyləyib: "Rəqib qapısı önündə təhlükə yaratmaq mənim ən güclü cəhətim sayıla bilər. Bu, mənim genimdə var. Anam vaxtilə həndbolçu olub, atam isə su polosu ilə məşğul olub. Valideynlərim mənim üçün dünyada ən önəmli şəxslərdir. Onlar hər istirahət günü təxminən 400 km qət edərək mənim oyunuma baxmağa gəlirlər. Bu, mənim üçün böyük stimuldur. Gələcəkdə onların qürur mənbəyi olmaq istəyirəm".

Renat "Leypsiq"ə pula görə keçməsi barədə deyilənlərə də münasibət bildirib: "Atam mənə belə söhbətlərə fikir verməməyi məsləhət gördü. O, mənə heç vaxt ruhdan düşməməyi və intizama əməl etməyi tapşırıb. Bu, çox vacibdir. Eyni zamanda onu da başa düşmək lazımdır ki, mənim yaşımda hər şey ola bilər".

Dadaşov öz hədəflərindən də söz açıb: "Arzum dünyanın ən yaxşı futbolçusu olmaqdır. Amma bu hədəfə çatmaq üçün hələ çox var. Kumirim Kriştiano Ronaldodur. Mən onun haqqında filmə baxmışam. Öz üzərində necə gərgin çalışdığını görmüşəm. Bu bir daha təsdiq edir ki, ideal futbolçu olmaq mümkün deyil. Bunun üçün gərək hər gün öz üzərində çalışasan. İndi "Leypsiq"də oynayıram və başqa təklif yoxdur. Hazırda əsas hədəfim Bakıda keçiriləcək AÇ-də oynamaq və titul qazanmaqdır". (LVZ)