Hacı Əhmədov: Avropa Liqasına vəsiqə qazana bilərik
AZAL-ın yarımmüdafiəçisi Hacı Əhmədovun azerisport.az saytına müsahibəsi
- Son turda "Kəpəz"ə 3:0 hesabıyla qalib gəlsəniz də, rəqib futbolçular pis oynamadıqlarını, sizin isə müdafiədə oturub, onların səhvlərini güddüyünüzü iddia edirlər...
- Biz sadəcə, öz oyunumuzu sərgilədik. Bizim də səhvlərimiz oldu. Amma "Kəpəz"in səhvlərindən yaxşı yararlandıq və lazım olan qolları vurduq.
- Çox az adam belə bir nəticənin qeydə alınacağını gözləyərdi. Şəxsən siz bunu gözləyirdiniz?
- Komanda hər oyunda meydana qələbə üçün çıxır. İstəyimizə çatdıq. Etiraf edim ki, hesab 2:0 olarkən matçın elə də bitəcəyini gözləyirdim.
- AZAL-da ilk qolunuz eyni zamanda çox gözəl alındı...
- Nə deyə bilərəm? Şadam ki, qol vurdum, komandama faydalı oldum. Bəli, bu, mənim vurduğum ilk qol idi. Bu da sevinci ikiqat artırır. Ümid edirəm ki, davamını gətirə biləcəyəm.
- Son qələbələrinə rəğmən, AZAL hələ də güclü rəqib hesab olunmur. Sizcə, bu, nə ilə bağlıdır?
- Buna heç fikir vermək də istəmirəm. Amma mənə elə gəlir ki, artıq bizə əvvəlki kimi sıradan bir komanda kimi yanaşmırlar. Biz öz gücümüzü göstəririk, nəticəmizi qazanırıq.
- Avropa Liqasına vəsiqə qazanmaq barədə ciddi düşünürsünüz?
- Hələ bu barədə danışmağımız tezdir. Nəyin necə olacağını zaman göstərəcək.
- Qarşıdakı "İnter"lə oyundan nə gözləyirsiniz?
- Oyuna ciddi hazırlaşırıq. Qələbə qazanmaq istəyirik. İndi bütün diqqətimiz Premyer Liqaya yönəlib. Hər şey uğurlu alınsa, Avropa Liqasına vəsiqə qazana bilərik.
- Sizə elə gəlmir ki, avrokuboklara buraxılmayacağı dəqiqləşən "İnter" motivasiyasız olacaq?
- Bizi ancaq qələbə narahat edir. "İnter"də vəziyyətin necə olmasını isə mən deyə bilmərəm.
- Bəs sizin sabiq klubunuz - "Qarabağ"ın çempionluğu barədə nə düşünürsünüz?
- Sona hələ var. Futbolda hər şey ola bilər. Əlbəttə, real baxsaq, çempionluğa ən real namizəd "Qarabağ"dır.
