Tadas Simaitis: Reynaldo Messi deyil ki, ondan qorxaq
"Kəpəz"in qapıçısı Tadas Simaitis Topaz Premyer Liqasının 28-ci turu çərçivəsində AZAL-a qarşı keçirdikləri səfər oyunundan (0:3) sonra azerisport.az saytının suallarını cavablandırıb.
- Ağır oyun oldu. Öncədən də belə çətin matç olacağını bilirdik. Çünki AZAL evdə yaxşı oynayır. Biz bu oyunda özümüzə xas olmayan səhvlərə yol verdik. Həm də kifayət qədər. Həm də rəqib hesabı açdıqdan sonra bizə oynamaq daha çətin oldu.
- Niyə 0:1-də sonra daha çətin oldu?
- Rəqib ağıllı oynadı, müdafiəyə diqqət ayırdı və bizim səhvə yol verməyimizi gözləməyə başladı.
- "Kəpəz"in ardıcıl qələbələrdən sonra AZAL-la matça arxayın çıxdığını demək olar?
- Xeyr. Əksinə, matça çox ciddi hazırlaşmışdıq. Niyə arxayınlaşmalıydıq ki. Çünki "İnter" bizdən cəmi bir xal geri qalırdı.
- Yəqin ki, belə böyük hesabla uduzmağınız gözlənilməz oldu...
- Əlbəttə, gözləmirdim. Amam futbolda belə hallar olur.
- 0:3 hesablı məğlubiyyəti "Qarabağ"la oyun öncəsi "Kəpəz" üçün zərbə saymaq olar?
- Ağdam klubu ilə oyun həmişə ağır olur. Növbəti oyunumuz da belə olacaq. Amma belə görüşlərdə motivasiya yüksək olur. Təəssüf ki, Juninyo olmayacaq. "Qarabağ"a qarşı tam fərqli futbol oynayacağıq. AZAL-a qarşı oyunda daha çox hücum edən tərəf biz idik. "Qarabağ"la oyunda isə biz müdafiə olunan tərəf olacağıq.
- Klubunuz bu mövsüm "Qarabağ"a bütün oyunlarda uduzub. Dördüncü oyunda qələbə, ən azı 1 xal qazanmağınızı gözləmək olar?
- Bəli, gözləməyə dəyər. Biz meydana uğur qazanmaq üçün çıxacağıq.
- Rəqibin heyətində Reynaldonun yaşıl meydana dönməsi sizi qorxutmur?
- Xeyr. Niyə qorxmalıyıq ki? Reynaldo Messi deyil ki, ondan qorxaq (gülür).
- "İnter"lə "Zirə"nin avrokuboklara çıxa bilməməsi sizin üçün üstünlükdür?
- Biz bu barədə düşünmürük. Avrokuboklara vəsiqəni özümüz təmin etmək istəyirik. Üçüncü yer bizim üçün yaxşı nəticə olardı.
- Mayın sonunda "Kəpəz"lə müqavilənizin müddəti bitir. Qalacaqsınız?
- Hələ klub rəhbərliyi ilə gələcək planlarla bağlı söhbətimiz olmayıb. Amma Azərbaycandan təklif var. Hazırda isə bütün diqqətim "Kəpəz"ə yönəlib.
