Elnur Məmmədov Neftçi futbolçularını hədələdi

"Neftçi"nin icraçı direktoru Elnur Məmmədovun azerisport.az saytına müsahibəsi

- "Rəvan"a da uduzdunuz. "Neftçi" niyə bu gündədir?
- Komandanın qeyri-sabit nəticələr göstərməsi bizi də narahat edir. "İnter"lə oyunda əksəriyyət meydan sahiblərinin qələbəsini proqnozlaşdırdığı halda, biz qalib gəldik. Bu görüşdə isə bizdən böyük hesablı qələbə gözləyirdilər. Amma məğlub olduq. Bunu Vəli Qasımovla müzakirə edəcəyik və müəyyən qərarlar qəbul edəcəyik. Uduzmaq da olar, udmaq da. Amma bu şəkildə yox.

- "Rəvan" bu mövsüm "Neftçi" oyunlarda 7 xal toplayıb...
- Onların bizim üçün uğursuz rəqib olduğu fikri ilə kifayətlənmək istəmirik. Meydana çıxmaq və oynamaq lazımdır. Meydanda var gücünü qoymaq lazımdır. Bizdə turnir cədvəlinin alt pillələrində olan komandalarla oyunlarda motivasiya problemi olur. İndiki heyət mövsümün sonunadək özünü göstərməlidir. Əks halda onların əvəzində heyətə başqa futbolçular cəlb olunacaq. "Neftçi" də oynamaq istəyirlərsə, məsuliyyətli olmalıdırlar.

- Klubun seleksioneri Bəxtiyar Musayev də "Neftçi"dən getdi. Bu isə sizi Sadıq Sadıqovun kadrlarını klubdan qovmaqda ittiham edənlərin əlinə növbəti material verdi...
- "Neftçi"nin çoxlu kadrı var ki, məndən əvvəl də komandada çalışıb. Hansısa kadr dəyişikliyi baş verirsə, buna normal yanaşmaq lazımdır. Bunu qəsdən etsəydik, ilk gündən həyata keçirərdik. Hər kəs özünü göstərmək imkanı qazanır.

- Sizi klubu zəif idarə etməkdə tənqid edirlər...
- Komanda zəif çıxış edirsə, tənqid də tam normaldır.

- Yeni baş məşqçi axtarışlarınız nə yerdədir? Gördüyünüz kimi, yerli mütəxəssislərlə nəyəsə nail olmaq olmur...
- Mən deməzdim ki, yerli məşqçilərlə heç nəyə nail olmaq mümkün deyil. Sadəcə, komandamıza böyük diqqət və təzyiq var. "Neftçi"də işləmək psixoloji baxımdan çətindir. Komandanın uğursuzluqlarını da ancaq məşqçilərlə əlaqələndirmək düz deyil.

- Bəs günahkar kimdir?
- Günahı ancaq bir nəfərin üzərinə atmaq mümkün deyil. Futbolçular üçün hər cür şərait yaradılır. Biz onları tənqid etmək istəmirik. Amma təəssüf ki, biz onlardan lazım olan məsuliyyəti görə bilmirik. Halbuki, bunu onların geyindiyi "Neftçi" forması tələb edir. Həm də manatın devalvasiyası bizim qış hazırlıq planlarımıza təsirsiz ötüşmədi. Məsələn, dörd legioner almaq, qarşımıza yüksək hədəflər qoymaq istəyirdik. Amma sonda seçimi bazanın inşasından yana etdik. Ümid edirik ki, bu planlarımız növbəti mövsümə qədər tam həyata keçəcək.