Georgi Navalovski: Mənə demişdilər ki, İnterin indiki oyunçuları da pulsuz oynayır
Gürcüstan yığmasının və Rusiyanın "SKA Energiya" klubunun müdafiəçisi Georgi Navalovski vaxtilə şərəfini qoruduğu Bakı "İnter"inin avrokuboklardan kənarlaşdırılmasına münasibət bildirib. Azerisport.az saytına açıqlamasında o, bunları söyləyib:
"Şübhəsiz ki, bu, heç də xoş hadisə deyil. Oradakı uşaqlara pulsuz oynamaq onsuz da çətin idi. Çünki hər biri öz ailəsini dolandırır. İndi artıq alırlar? Mənə elə gəlirdi ki, indiki futbolçular orada pulsuz oynayırlar. Amma etiraf edim ki, bunu mənə kimin dediyini dəqiq xatırlamıram. Bildiyimə görə, kimlər ki, maaşlarını ala bilmirdi, onlar klubdan şikayət edibmiş. İstənilən halda "İnter" avrokuboklardan kənarda qaldı. Amma hansı futbolçu belə olmasını istəyər ki? Mən heç özüm də elə vəziyyətdə olmaq istəmərəm. Çünki komanda çalışır, çempionatda yüksək yerlər uğrunda mübarizə aparır, amma sonda avrokuboklara yollanmağında problem yaranır. Bundan sonra gürcü oyunçuların orada qalıb-qalmayacağına gəlincə, bunu mən dəqiq deyə bilmərəm".
