Azərbaycan Hollandiya ilə matç öncəsi mövqeyini qorudu

Futzal üzrə yığma komandaların yeni reytinq cədvəli açıqlanıb. Azerisport.az xəbər verir ki, millimiz siyahıdakı əvvəlki mövqeyində qalıb.

Belə ki, Azərbaycan yığması yenə 10-cu pillədədir. Hesabımızda 1411 reytinq xalı var.

Dünya çempionatına vəsiqə uğrunda cavab pley-off oyunu keçirəcəyimiz Hollandiya yığması isə 1213 xalla 26-cıdır.

Qeyd edək ki, Azərbaycan və Hollandiya futzalçıları arasındakı cavab görüşü aprelin 12-də Bakıda baş tutacaq. Tərəflər arasındakı ilk oyunda yığmamız 5:1 hesabıyla qalib gəlmişdi.

İlk üçlükdə qərarlaşan kollektivlərə gəlincə, Braziliya 1919 xalla zirvədədir. Bu ölkənin milli komandasını 1910 xalı olan İspaniya və 1743 xala malik Rusiya yığması izləyir.