Bəxtiyar Musayev: Slavço Georgiyevski etiraf etdi və üzr istədi

"Neftçi"nin məşqçisi Bəxtiyar Musayev Slavço Georgiyevskinin ötən gün saytımıza verdiyi müsahibədə səsləndirdiyi fikirlərə münasibət bildirib. Azerisport.az saytına açılqmasında o, bunları söyləyib:

"Son dövrlər mətbuata açıqlama verib, sonradan onu danmaq dəbə minib. Georgiyevskinin saytınıza açıqlamalarını oxuyandan sonra ilk işim ona zəng vurmaq oldu. Ondan bu sözləri deyib-demədəyini soruşdum. Etiraf etdi ki, söyləyib.

Dedim ki, vaxtilə birgə işləyəndə heç bir problemimiz olmayıbsa, niyə indi məni bu klubda lazımsız hesab edirsən? O, rus dilini bilir. Buna görə də biz çox söhbət etdik. Həm futboldan, həm də digər məsələlərdən. Slavço etiraf etdi ki, mənimlə heç bir problemi olmayıb. Sadəcə, komandada niyə kənar qaldığını anlamayıb. Mən ona çempionatın qalibi olmağımıza necə kömək etdiyini xatırlatdım, amma sonradan müqavilənin yenilənməməsinə qərar verildi. Komandanın onun gedişindən sonra necə oynadığını, Avroliqanın qrup mərhələsinə necə vəsiqə qazandığını anlatdım. Hətta Slavçoya "Neftçi"dən ayrılandan sonra da heç bir problemimizin olmadığını xatırlatdım. İndi o, müsahibə verir, məni tənqid edir. Sözlərindən incidiyimi görüb, üzr istədi. Ola bilər ki, mən müsahibə verməməklə, "Neftçi"də necə futbolçu və məşçqi karyeramın olması barədə danışmamaqla düz etmirəm. Amma Georgiyevski istənilən halda belə fikir səsləndirməməli idi".