Vasili Utkin: Azərbaycan futbol baxımından müəyyən mənada Rusiyaya bənzəyir

Rusiyalı məşhur futbol şərhçisi Vasili Utkin Azərbaycanda futbolun səviyyəsi ilə bağlı fikirlərini bölüşüb. Azerisport.az sizi həmin açıqlamalarla tanış edir.

- Bir müddət öncə Bakıda oldunuz. Şəhərlə bağlı hansı təəssüratlarınız qalıb?
- Azərbaycan paytaxtında bir neçə dəfə olmuşdum. Düzdür, həmin səfərlərimin üstündən çox vaxt keçmişdi. Bakı mənim yadımda çox təmiz və isti şəhər kimi qaldı. Güman edirəm ki, mən oraya ən isti vaxtında gəlmişdim. Bakı çox sürətlə dəyişən şəhərdir. Amma bu, mənim xoşuma gəlir ki, şəhər öz zahiri görünüşünü dəyişməyə çalışır. Ümumiyyətlə, Azərbaycan paytaxtı çox xoşuma gəlir.

- Sizcə, Azərbaycan futbolu hazırda hansı səviyyədədir?
- Əlbəttə, bu ölkədə futbolun səviyyəsinin daha yaxşı olması arzulanandır. Nəticə baxımından müzakirə aparsaq, Azərbaycan klubları avrokuboklarda buna nail olurlar. Təəssüf ki, hazırda Azərbaycanda futbolun inkişafına dair hansısa proqramın olub-olmadığını, ümumiyyətlə, bu yöndə nə kimi addımlar atıldığını bilmirəm. Azərbaycan futbol baxımından müəyyən mənada Rusiyaya bənzəyir. Məmurların futbola effektli şəkildə rəhbərlik etməsinə, bu idman növünü hansısa səviyyəyə qaldırmasına inanmıram. Azərbaycanda da, Rusiyadakı kimi, bu idman növünü ancaq futbola öz şəxsi maraqları kimi baxanlar, məsələn, biznesmenlər inkişaf etdirə bilər.