Süleymanov: Georgiyevski kimdir ki, Sadıqova kimlə çalışmasına dair məsləhət verir?

"Neftçi"nin sabiq vitse-prezidenti Tahir Süleymanov bu komandanın keçmiş yarımmüdafiəçisi Slavço Georgiyevskinin saytımıza açıqlamalarına münasibət bildirib. Azerisport.az saytına açıqlamasında o, bunları söyləyib:

"Georgiyevski kimdir ki, Sadıq Sadıqova kiminlə işləyib, kiminlə işləməməsinə dair məsləhət verir? Bizim beş illik fəaliyyətimiz dövründə "Neftçi"nin hansı uğurlara imza atdığı göz önündədir. Slavço bizimlə iki dəfə çempion oldu. Amma biz düzgün qurulmuş iş sayəsində daha bir neçə dəfə çempion olduq. Bir halda ki, o, belə qəhrəmandır, niyə "İnter"ə keçəndən sonra çempion olmadı?"

"Yəqin unudub ki, "Neftçi" güclənəndən sonra "İnter"lə oyunda Erik Ramos onu öz qapısına doğru necə sıxışdırmışdı. Çox təəssüf ki, illər sonra Slavço belə "mahnılar oxumağa" başlayıb. Vaxtilə bir gündə yüz dəfə "vitse, vitse" deyə müraciət edirdi, az qala qarşımda əyilirdi. Yəqin, yaddaşı korlanıb, vaxtilə olanları unudub".

Süleymanov həmçinin Georgiyevskinin Avropa Liqasının qrup mərhələsində çıxış edən "Neftçi"nin həmin heyətinin Arif Əsədov tərəfindən formalaşmasına dair açıqlamasına da münasibət bildirib: "Ona xatırlatmaq lazımdır ki, həmin vaxt bizdə düzgün seleksiya işləri qurulmuşdu. Biz heyəti 70 faiz dəyişmişdik. Yeri gəlmişkən, eşitmişəm ki, o, "Neftçi"dən gedəndən sonra deyibmiş ki, "Neftçi" qrup mərhələsinə vəsiqə qazansa, Bakının küçələrində lüt gəzəcək. Verdiyin sözə əməl etməmək yaxşı deyil. Heç kimə öz axmaq fikirlərini Azərbaycan mətbuatına açıqlamağı məsləhət görmürəm".