Elmar Baxşiyev: Yığmaya inanmağa dəyər

Azərbaycan yığmasının sabiq yarımmüdafiəçisi Elmar Baxşiyev milli komandamızın Qazaxıstanla yoxlama oyununda 0:1 hesablı məğlubiyyətlə üzləşməsinə münasibət bildirib. Azerisport.az saytına açıqlamasında o, bunları söyləyib:

"Yoxlama oyunlarında nəticə o qədər də önəmli deyil. Amma bu rəqib üzərindəki qələbə futbolçularda özünə inamı artıra bilərdi. Mənə Robert Prosineçkinin seçdiyi start heyəti maraqlı gəldi. Eyni zamanda yığmamızın uzun müddət idi oynamaması da hiss olunurdu. Araz Abdullayevin mövqeyinin dəyişdirilməsini də qeyd etmək lazımdır. Qazaxıstana uduzsaq da, mənə elə gəlir ki, bu komandada hər şey yaxşı olacaq. Futbolçularımızın oyundan oyuna daha da yaxşı çıxış edəcəklərinə inanmağa dəyər".