Bədavi Hüseynov: Kapitan sarğısının mənə tapşırılması gözlənilməz oldu

Azərbaycan yığmasının müdafiəçisi Bədavi Hüseynov Antalyada (Türkiyə) Qazaxıstan yığmasına qarşı keçirilmiş yoxlama oyununu şərh edib. Azerisport.az xəbər verir ki, o, 0:1 hesablı məğlubiyyətdən sonra bunları söyləyib:

"Rəqib oyuna yaxşı başladı. Çox güclü pressinq tətbiq edirdilər. Eyni zamanda standart vəziyyətlər zamanı rəqibin düşünülmüş davranışlarına hazır deyildik. Buna görə də gözlənilməz qol buraxdıq. Baxmayaraq ki, oyuna heç də pis başlamamışdıq. Komandamız ilk dəfə deyil ki, bu qədər qol epizodu yaradıb, onlardan yararlana bilmir".

Hüseynov Rəşad Sadıqovun kapitan sarğısını ona verməsinə də münasibət bildirib: "Sadıqov meydanı tərk edəndə kapitan sarğısını mənə verdi. Bu, mənim üçün gözlənilməz oldu. Çünki oyundan öncə bu barədə danışmamışdıq. Mən sarğını Kamran Ağayevin alacağını zənn edirdim. Axı o, yığmada uzun müddətdir çıxış edir. Amma Robert Prosineçki sarğını mənə həvalə etdi. Buna normal yanaşıram. Fikrimcə, bu, məsuliyyəti daha da artırır. Baş məşqçi kapitan sarğısını mənə həvalə edirsə, deməli, gələcəkdə də mənə güvənəcək".

Bədavinin sözlərinə görə, ikinci hissədə meydana çıxan futbolçular komandamızı gücləndirdilər: "Baş məşqçi altı əvəzetmə etdi. Fikrimcə, onların hər biri öz tapşırığının öhdəsindən layiqincə gəldi. Xüsusilə cinahlarımız çox sürətli idi. Namiq Ələsgərovla Cavid Tağıyev oyuna yaxşı qoşuldular. İkinci hissədə biz hücum edən tərəf idik. Rəqibə meydanın özünə aid hissəsindən çıxmağa imkan vermirdik. Əslində, matça belə başlamaq lazım idi. Amma alınmadı".

Müdafiəçi sonda "Qarabağ"ın çempionatdakı çıxışına da toxunub: "Toplanış bitən kimi klubun düşərgəsinə dönəcəyik. Belə gərgin qrafikə alışmışıq. Bərpa olmaq üçün bir neçə günə ehtiyac var. Ondan sonra Premyer Liqa oyunlarına köklənmək lazım gələcək".