Ayaz Quliyev: Azərbaycan yığması çox xoşuma gəldi

Rusiyanın 21 yaşadək futbolçulardan ibarət yığma komandasının Azərbaycan əsilli yarımmüdafiəçisi Ayaz Quliyev AÇ-2017-nin seçmə mərhələsi çərçivəsində ötən gün millimizə qarşı keçirdikləri oyundan (2:2) sonra azerisport.az saytının suallarını cavablandırıb.

- Heç-heçədən razı qaldınız?
- Bu matç üçün hədəfimiz qələbə qazanmaq idi. Ancaq bu barədə düşünürdük. Amma alınmadı.

- Azərbaycan yığmasının səfər oyununda da iki qol vurduğunu nəzərə alsaq, millimizin Bakıda 3:0 hesablı qələbəsinin təsadüfi olmadığını demək olar?
- Biz ev oyununda standart vəziyyətlərdən qollar buraxdıq. Hansı ki, bu baxımdan problemlərimiz var. Bu çatışmazlığı aradan qaldırmağımız lazımdır. Azərbaycanla oyun öncəsi bu yöndə müəyyən qədər çalışmışdıq. Amma görünür hələ çox çalışmalıyıq. Həm də ələ düşən qol şanslarından yaxşı yararlana bilmirik.

- Azərbaycan yığması barədə nə deyə bilərsiniz?
- Çox xoşuma gəldi. Topa yaxşı nəzarət edirdilər, ötürmələrdən yararlanmağa çalışırdılar. Həm də bunu heç bir həyəcan olmadan edirdilər.

- Meydana "Azərbaycana mütləq qol vurmalıyam" fikri ilə çıxmışdınız?
- Prinsipcə, mən hər oyunda meydana komandamın qələbə qazanmasına kömək etmək üçün çıxıram. Rəqibin kim olmasının fərqi yoxdur.

- Matçdan sonra yığmamızın üzvləri ilə söhbət etdiniz?
- Əlbəttə. Bir neçəsi ilə salamlaşdıq. Bir-birimizə təşəkkür etdik, uğurlar arzuladıq.

- Rusiya yığmasını qarşı Almaniya və Avstriya ilə oyunlar gözləyir. Qrupdan çıxacağınıza inanırsınız?
- Şansımız çox azdır. Amma nə qədər ki, şans var, bunun üçün mübarizəmizi davam etdirəcəyik. Allah eləsin ki, qrupdan çıxaq.