Vüqar Əsgərov: Şərtləri məni razı saldı, sabah müqavilə bağlamağa gedirəm

Futbol üzrə Azərbaycan yığmasının sabiq hücumçusu Vüqar Əsgərov qarşıdakı planları və millimizə qayıtmaq istəyindən söhbət açıb. Azerisport.az saytına açıqlamasında o, bunları söyləyib:

"1625 Liepaya" klubundakı çıxışım uğurlu alınsa da, mövsüm bitəndən sonra klubsuz qaldım. Bir neçə gün öncə tanış bir məşqçi zəng etmişdi. O, dedi ki, birinci divizionda çıxış edən başqa bir klub - "Salaspils" məni öz heyətində görmək istəyir. Bildirdi ki, "Əsgərov, bəsdir evdə oturdun, Riqaya gəl, müqavilə imzala". Mən də razılaşdım. Çünki şərtlər məni qane etdi. Sabah Riqaya yollanacağam".

Əsgərov vətəndə tez unudulmasından da söz açıb: "Mən də hərdən bu barədə düşünürəm. Özümə də qəribə gəlir ki, Azərbaycanda niyə məni belə tez unutdular. Çünki o dərəcədə pis deyildim. Sadəcə, Əsgər Abdullayevin rəhbərliyi altında "Araz Naxçıvan"da normal oynaya bilmədik. Tək buna görə mənim üstümdən xətt çəkmək olmaz".

Millimizin sabiq üzvü Berti Foqtsun dövründə oynadığı yığmamızla indiki komandanı da müqayisə edib: "Yığmamız həmişə güclü olub. Sadəcə, Berti Foqtsun öz sevimli futbolçuları var idi. Hamı onun legionerləri necə sevdiyini bilirdi. İndiki yığmamız da güclüdür. Qarşıdakı Qazaxıstanla yoxlama oyununu səbrsizliklə gözləyirəm. Bizimkilərə azarkeşlik edəcəyəm. Özümə gəlincə, yığmada niyə qala bilmədiyimi deyə bilmərəm. Həmişə millinin şərəfini qorumaq üçün alışıb-yanmışam. Özümü yığma komandada yaxşı tərəfdən göstərməyə çalışmışam. Sadəcə, sabit dəvət ala, oynaya bilmədim".

Vüqar azərbaycanlı futbolçular - Orxan Qurbanlı ilə Mirabdulla Abbasovun Latviyanın yüksək liqa klubu "Dauqavpils"ə transferindən də danışıb: "Latviya çempionatının oyunları ilə bağlı dəqiq proqnoz vermək çox çətindir. "Dauqava" və "Skonto"da əvvəllər də azərbaycanlı futbolçular çıxış ediblər. Amma onların oyunu alınmayıb. Ümid edirəm ki, bu uşaqlar "Dauqava"da özlərini yaxşı tərəfdən göstərə biləcəklər və onlarda hər şey alınacaq".