Saşa Yunisoğlu: Ağabala Ramazanovu layiq olduğu qoldan məhrum etmək düz deyil
"Rəvan"ın müdafiəçisi Saşa Yunisoğlu Topaz Premyer Liqasının 26-cı turu çərçivəsində "Sumqayıt"a qarşı keçirdikləri oyunda ilk qolun onun adına avtoqol kimi yazılmasına münasibət bildirib. Azerisport.az saytına açıqlamasında o, bunları söyləyib:
"Bu, mənim üçün gözlənilməz xəbər oldu. Futbolda heç kim avtoqoldan sığortalanmayıb. Amma bu qol mənim adıma səhvən yazılıb. Top həmin epizodda mənə toxunandan sonra Ağabala Ramazanova da dəydi və qaydalara görə, müəllif odur. Videotəkrar da buna sübutdur. Ramazanovdan da soruşa bilərsiniz. PFL-də ilk iş günü martın 28-də olacaq və klub tərəfindən onlara rəsmi müraciət edəcəyik ki, bu səhvi düzəltsinlər. Fikrimcə, "Sumqayıt" da eyni addımı ata bilər. Ramazanovu layiq olduğu qoldan məhrum etmək düzgün deyil. Çünki ola bilər ki, mövsümün sonunda məhz bu qol onun üçün bombardirlik yarışında həlledici olsun. Mənim üçün isə bu epizod heç nəyi dəyişmir. Onsuz da hamı hər şeyi yaxşı gördü. Mənim orada günahım yox idi. Bir müdafiəçi üçün də əsas olan budur. İnanıram ki, PFL bu səhvi aradan qaldıracaq və qolun müəllifliyini Ramazanova qaytaracaq. Hansı ki, o, buna doğrudan da layiq idi".
