Şəmkir bəyanat yaydı: Heç bir halda təxribata getməyin!
Azərbaycan birinci divizionunda çıxış edən "Şəmkir" klubu bəyanat yayıb. Azerisport.az sizi həmin bəyanatla tanış edir:
"Hörmətli azarkeşlər!
Son turlarda ev oyunlarında rəqib komandaya göstərilən qeyri-peşəkar davranış və nəticədə baş verən xoşagəlməz hadisələrlə əlaqədar AFFA-da bütün klubların rəhbərləri və baş meşqiçiləri ilə görüş keçirilib və ev oyunlarında ev sahiblərinə asayişin qorunması kimi böyük məsuliyyət müəyyən edilib. Qonaq komandanın tam təhlükəsizliyinə ev sahibi təminat verir. Təhlükəsizlik təmin edilmədiyi halda ev sahibinə texniki məğlubiyyət veriləcək. Bu səbəbdən hər zaman rəqib komandaya və onun azarkeşlərinə göstərdiyiniz peşəkar yanaşmanı bir daha göstərməyinizi xahiş edirik. Heç bir halda təxribata getməyin. Rəqib komandaya həm meydanda, həm də meydandan kənarda peşakarlıq nümayiş etdirmək lazımdır. Komandaya dəstəyinizi bir daha göstərmək zamanıdır.
Öncədən təşəkkür edirik".
