Oqtay Abdullayev: Oyun almaq bizim nəyimizə lazımdır ki?
"Turan Tovuz"un Müşahidə Şurasının sədri Oqtay Abdullayev klubdakı hazırkı vəziyyətlə bağlı fikirlərini bölüşüb. Azerisport.az saytına açıqlamasında o, bunları söyləyib:
"Son turda birinci divizionun lideri "Neftçala" üzərində qələbə qazanmağımız (1:0) böyük rezonansa səbəb oldu. Hətta Tovuz rəhbərliyi də mənə zəng etmişdilər. Mətbuatda belə bir informasiya yayılıb ki, guya həmin oyun danışılmış olub. Bu, məni çox məyus etdi. Bizim onların da dediyi kimi, oyun almaq nəyimizə lazımdır ki? Turnir cədvəlinin ortasında qərarlaşmışıq, çempionluğa iddiamız qalmayıb. Çünki liderlərdən çox geri qalırıq. Sadəcə, komandamıza hər oyunda qələbə qazanmaq vacibdir. Belə olan halda klubumuza olan diqqət daha da artmış olar".
Abdullayev həmçinin komandanın yeni baş məşqçisi Əsgər Abdullayevin Tovuz klubunu məşqlərə "Neftçi"nin formasında çıxarmasına da münasibət bildirib: "Bayramla əlaqədar administratorumuz bir neçə gün idi işləmirdi. Yaxın günlərdə biz Əsgər Abdullayevə klubun öz formasını verəcəyik. Amma bütövlükdə, burada pis heç bir şey yoxdur".
