Şəhriyar Rəhimov: Kəpəz ən azı dördüncü ola bilər
"Kəpəz"in yarımmüdafiəçisi Şəhriyar Rəhimov Topaz Premyer Liqasının 26-cı turu çərçivəsində "Neftçi" üzərində 3:2 hesabıyla qalib gəldikləri oyundan sonra azerisport.az saytının suallarını cavablandırıb.
- Qələbə barədə nə deyərdiniz?
- Layiqli qələbədir. İlk 5 dəqiqədə yaxşı çıxış etmədik. Amma sonradan ilk yarı tamamilə bizim üstünlüyümüz şəraitində keçdi. 2:0-dan sonra daha çox müdafiəyə diqqət yetirməyə başladıq. Buna görə də rəqibin qapımız qarşısında təhlükəli vəziyyətləri artmağa başladı. Xoşbəxtlikdən, 2:2-dən sonra da qol vura və qələbə qazana bildik.
- Rəqib hesabı bərabərləşdirəndə üçüncü qolu da buraxacağınızı düşünmədiniz?
- Həmin anda psixoloji üstünlük "Neftçi"nin tərəfində idi. Amma biz də öz şansımızı gözləyirdik. Son ana qədər uğur qazanacağımıza inanırdıq.
- Sizcə, qapınıza təyin olunan penalti ədalətli qərar idi?
- Meydanda hər şeyi kənardakı kimi görmək olmur. Amma mən Şəhriyarın bir qədər Anyeteni tutub saxladığını gördüm. Dəqiq fikri yalnız epizodun təkrarına baxdıqdan sonra söyləmək olar.
- Komandanızın qələbə qolunu siz vurdunuz. Amma həmin anda meydan sahibləri hakimi alqışlamaqla qolun ofsayddan vurulduğunu iddia edirdilər...
- Top mənə "Neftçi"nin oyunundan gəldi. Odur ki, həmin epizodda heç bir ofsayd yox idi. Həm də qolu kimin vurmasının əhəmiyyəti yox idi, əsas komandamızın qələbə qazanması idi. "Kəpəz" neçə il idi "Neftçi"yə qalib gələ bilmirdi. Xoşbəxtlikdən bu uğursuz gedişata son qoyduq. "Kəpəz"in bu rəqibinə 11 il idi qalib gələ bilməməsi müəyyən qədər bizdə əlavə motivasiya da yaratmışdı. Səhv etmirəmsə, "Kəpəz" "Neftçi" üzərindəki sonuncu qələbəsini də elə Şahin Diniyevin rəhbərliyi altında qazanmışdı.
- Bu qələbəni həm də avrokuboklara vəsiqə qazanmaq iddianızın olduğuna işarə saymaq olar?
- Bəli, Avropa Liqasında oynamaq istəyirik. Bunu kim istəməz ki? Əlimizdən gələni edəcəyik ki, buna nail olaq.
- Klubunuzun elə də böyük büdcəsi yoxdur və belə şərtlər altında Avropada çıxış etmək istəyirsiniz?
- Bəli, bəzi klublarla müqayisədə bizim klubun büdcəsi elə də böyük deyil. Amma komandadakı yaxşı atmosfer hamımıza təsir edir. Maaşlarda elə də gecikmə olmur. Məsələn, bu ay maaşlarımız beş gün gecikmişdi. Amma ondan əvvəl heç bir gecikmə olmamışdı. Hazırda ölkənin ən yaxşı komandası olmasaq da, baxımlı futbol sərgiləyirik və ən azından dördüncü ola bilərik.
- Qarşıda sizi bu mövsüm iki dəfə heç-heçə etdiyiniz debütant "Zirə" ilə oyun gözləyir...
- Həmin oyunda Julien Ebah bizə kömək edə bilməyəcək. Bu, bizim üçün böyük itkidir. Dario Junior da uzun müddətdir komandamıza kömək edə bilmir. Amma istənilən halda növbəti oyunda da uğur qazanmaq üçün əlimizdən gələni edəcəyik.
