Elnur Məmmədov: Yeni baza klubun 80 illiyinə qədər tam hazır olacaq

"Neftçi"nin icraçı direktoru Elnur Məmmədov klubun inşa etdirdiyi yeni baza ilə bağlı fikirlərini bölüşüb. Azerisport.az xəbər verir ki, o, bunları söyləyib:

"Burada işlərə noyabr ayından start verilib. Təbii örtüklü üç meydançamız artıq hazırdır. Hədəfimiz klubun bazasını 2017-ci ilə, klubumuzun 80 illiyinə qədər tam hazır vəziyyətə gətirməkdir. Gələn il klubumuzun buraya köçməsini istəyirik. Baza "Neftçi"nin bütün komandalarının burada məskunlaşmasına, məşq etməsinə imkan verəcək. Əsas stadion isə yenə "Bakcell Arena" olacaq. Azarkeşlərimiz məşqlərimizə gələ biləcək. Hazırda isə bu meydançaları 17 yaşadək futbolçulardan ibarət yığma komandalar arasında Bakıda keçiriləcək AÇ-2016-nın iştirakçılarının məşq etmələri üçün hazırlayırıq".