Təmkin Xəlilzadə: Robert Prosineçkidən dəvət gözləmirdim
"Zirə"nin yarımmüdafiəçisi Təmkin Xəlilzadə Topaz Premyer Liqasının 26-cı turu çərçivəsində AZAL-a qarşı keçirəcəkləri oyun öncəsi azerisport.az saytının suallarını cavablandırıb.
- Qış fasiləsindən sonra inamlı təsir bağışlayan AZAL-la görüşdən nə gözləyirsiniz?
- Onlar üçüncü dövrədə doğrudan da çox yaxşı çıxış edirlər. Amma bütövlükdə götürsək, Premyer Liqada onsuz da zəif rəqib yoxdur. AZAL-la oyuna da üç xal qazanmaq üçün çıxacağıq. Çünki buna çox ehtiyacımız var.
- Cari mövsümdə özünüzü yaxşı tərəfdən göstərdiyinizi nəzərə alsaq, Robert Prosineçkidən dəvət gözləyirdiniz?
- Etiraf edim ki, yox. Prosineçkidən dəvət gözləmirdim. İstənilən halda milliyə dəvət almağa layiq olsaydım, çağırardılar. Qarşıdakı matçlarda özümü daha yaxşı tərəfdən göstərməyə çalışacağam. Zamanı gələndə, məni də yığmaya dəvət edəcəklərinə inanıram.
- "Zirə"nin avrokuboklara buraxılmayacağına dair ehtimalların çox olduğunu nəzərə alsaq, özünüzü oyunlara necə kökləyirsiniz?
- Bu məsələ ilə futbolçular yox, klub rəhbərliyi məşğul olur. Rəhbərlik də bizə deyib ki, bunu düşünməyin, öz işinizi görün. Əminəm ki, klub rəhbərliyi avrokuboklara buraxılmağımız üçün əlindən gələni edəcək. Bizə isə ancaq futbol oynamaq qalır.
- Son turda "Qəbələ" üzərində qələbəniz çox gözlənilməz oldu...
- Biz həmin oyuna çox yaxşı hazırlaşmışdıq. Kubokdakı 1:5 hesablı məğlubiyyətin əvəzini çıxmağı çox istəyirdik. Buna da nail olduq. Qələbə bizim ikinci pillədəki mövqeyimizi möhkəmləndirməyimizə kömək etdi.
- Bəs həmin darmadağından sonra özünüzü necə motivasiya etdiniz?
- Qəbələdə qalmağımız bizim xeyrimizə oldu. Kubok matçından sonra Bakıya qayıdıb, çempionat oyunu üçün yenidən oraya yollanmaq əlavə güc və vaxt itkisi olardı. Matçdan öncə məşqçilərimiz bizə bu rəqibə qalib gələcək gücdə olduğumuzu deyirdilər. Premyer Liqadakı əvvəlki iki oyundan birində onlara qalib gəlmişdik, digəri heç-heçə bitmişdi. Rəqibi yaxşı analiz etmişdik, zəif cəhətlərini bilirdik.
- "Zirə"nin Premyer Liqada daha uğurlu çıxış etmək naminə kuboku qurban verdiyi deyilir...
- Xeyr, elə bir şey yoxdur. Mümkün qədər irəli getmək istəyirdik. Gənc bir klub kimi mümkün qədər yaxşı nəticələrə imza atmaq istəyirik. Kubokda daha çox irəliləmək üçün gücümüz yetmədi.
- Çempionatda uğur qazanacağınıza inanırsınız?
- Bizim qarşımıza nəinki qızıl, heç gümüş medal qazanmaq hədəfi də qoyulmayıb. Hədəfimiz sadəcə, yaxşı kollektiv yaratmaqdır. Allaha şükürlər olsun ki, buna nail olduq. Bundan sonrası da öz əlimizdədir. Çempionluğa gəlincə, belə bir uğura imza ata biləriksə, niyə də olmasın?
