Ansi Aqolli: Zirənin heç bir nəticəsi mənim üçün sürpriz deyil
"Qarabağ"ın müdafiəçisi Ansi Aqolli Topaz Premyer Liqasının 26-cı turu çərçivəsində "Qəbələ"yə qarşı keçirəcəkləri oyun öncəsi azerisport.az saytının suallarını cavablandırıb.
- Sizi qarşıdakı çətin oyunda bir xal da qane edəcək, ya meydana ancaq qələbə üçün çıxacaqsınız?
- Bizim üçün ancaq qələbə vacibdir. Amma "Qəbələ"nin çox güclü heyəti var. Bizi çətin oyun gözləyir. İstənilən halda bu, həlledici bir qarşılaşma sayıla bilməz.
- "Qəbələ"nin sizdən öncə "Zirə"yə uduzması sürpriz olmadı?
- "Zirə"nin heç bir nəticəsi mənim üçün sürpriz deyil. Bu, faktdır. Kimsə "Zirə"ni aşağı diviziondan gəldiyinə görə zəif hesab edirsə, çox yanılır.
- Son turda "Qarabağ" "Sumqayıt"ı demək olar ki, problemsiz məğlub etdi...
- Maraqlı və vacib oyun idi. Qələbə qazanmağımız vacib idi. Şadam ki, buna nail olduq.
- "Sumqayıt"ı həm kubokdan uzaqlaşdırdınız, ardından da çempionatda qalib gəldiniz. Bu mövsüm Premyer Liqada bu komandaya qalib gələ bilmədiyinizi nəzərə alsaq, həmin uğursuzluğun revanşını aldığınızı demək olar?
- Revanş? Elə deyil. Hədəfimiz yarımfinala çıxmaq idi, buna nail olduq. Çempionatda da qalib gəlmək istəyirdik. Yəni hədəf nəyinsə qisasını almaq yox, sadəcə, uğur qazanmaq idi.
- Son oyunda İlqar Qurbanovu əvəzləyib, cəmi üç dəqiqə oynadınız. Niyə?
- Xüsusi bir səbəbi yoxdur. Baş məşqçi mənim matçın sonunda meydana çıxmağıma qərar verdi. Mən də 87-ci dəqiqədə Qurbanovu əvəzlədim. Baş məşqçidən həmişə şans gözləyirəm.
- Sizcə, "Qarabağ"ın çempionatda niyə layiqli rəqibi yoxdur?
- "Qarabağ" lider olsa da, hələ çempion olmayıb. Qarşıda çox oyun var. Hər şey ola bilər. Sadəcə, gözləmək lazımdır.
- Kubokun yarımfinalında "İnter"lə qarşılaşacaqsınız. "Qızıl dubl" etməyiniz mümkün olacaq?
- İndi bütün diqqətimiz Premyer Liqa oyunlarına yönəlib. Çünki "İnter"lə oyuna qədər bizim çox çətin görüşlərimiz olacaq. Kubok oyunlarına sonra köklənərik.
