Topaz Premyer Liqasında 26-cı tur həyəcanı

Bu həftə Topaz Premyer Liqasında 26-cı turun oyunları keçiriləcək. Azerisport.az xəbər verir ki, 3 gün davam edəcək turun açılış günündə bir görüş baş tutacaq.

Öncə çempionatın aşkar autsayderi “Rəvan” doğma meydanda “Sumqayıt”la münasibətlərinə aydınlıq gətirəcək. Bu komandalar son dövrlərdə demək olar ki, oxşar aqibətlə üzləşiblər. "Rəvan" öncə kubokda mübarizədən kənarlaşdıra bilmədiyi "İnter"ə çempionatda da uduzdusa, "Sumqayıt" da "Qarabağ"la duellərdə oxşar aqibətlə üzləşdi. Bu üzdən də hər iki komanda qarşıdakı oyuna uğursuz gedişata son qoymaq gözü ilə baxır. Tərəflərin əvvəlki 14 oyununda paytaxt təmsilçisinin üstünlüyü var. Bu komanda altı görüşdə qalib gəldiyi halda, sumqayıtlılar cəmi iki qələbəyə seviniblər. Daha altı qarşılaşmada isə qalib müəyyənləşməyib. Top fərqində də bakılılar üstündür - 19:15. Son 6 görüşdə sumqayıtlılar qalib gələ bilməyib. Ardıcıl 5 oyunda komandalar hərəyə 1 xal qazanıb. “Rəvan” bütün səfər oyunlarında qol vurub. Cari mövsüm baş tutan görüşlərə gəlincə, Bakıdakı oyun qolsuz bitdiyi halda, Sumqayıtdakı qarşılaşmada qapılara 6 qol vurulmuşdu - 3:3. Tərəflərin bu dəfəki duelinin necə bitəcəyi maraqla gözlənilir.

İkinci oyun günündə iki görüş baş tutacaq. Əvvəlcə lider "Qarabağ" səfərdə "Qəbələ"nin qonağı olacaq. Turun mərkəzi oyununa maraq böyükdür. "Qəbələ" qalib gəlməklə çempionatdakı intriqanın daha da qızışmasına səbəb ola bilər. Əks halda "Qarabağ" qalib gəlməklə qızıl medalların taleyinə böyük ölçüdə aydınlıq gətirmiş olacaq. Bu komandalar indiyə qədər 30 dəfə üz-üzə gəliblər. Təbii ki, bu görüşlərin əksərində (13 matçda) "Qarabağ" qalib gəlib. 10 oyun heç-heçə bitdiyi halda, "Qəbələ" sadəcə, 7 qələbəyə sevinib. Top fərqi də ağdamlıların xeyrinədir - 40:28. 31-ci görüşə çıxacaq komandaların son 3 görüşündə qalib müəyyənləşməyib. Cari mövsümə təsadüf edən görüşlərə gəlincə, Qəbələdə 2:2, Bakıda 1:1 hesablı heç-heçə qeydə alınıb. “Qarabağ” 5 matçdır bu rəqibinə qalib gələ bilmir. “Qəbələ” isə son 7 ev matçında yalnız 1 qələbə qazanıb.

Günün digər matçında çempionatımızın qocaman kollektivləri - "Neftçi" ilə "Kəpəz" üz-üzə gələcək. Bu komandalar Premyer Liqa çərçivəsində 42-ci oyuna çıxacaqlar. Əvvəlki 41 oyundan 19-da bakılılar, 15-də gəncəlilər qalib gəliblər. Yalnız 7 oyunda heç-heçə qeydə alınıb. Paytaxt klubu 9 matçdır rəqibinə uduzmur. “Kəpəz” son qələbəsini 11 il əvvəl qazanıb. Cari mövsümə təsadüf edən son 2 matçda da qalib müəyyənləşməyib - Bakıdakı görüşdə hesab açılmayıbsa, Gəncədəki qarşılaşmada 1:1 hesablı heç-heçə qeydə alınıb. İndiyəqədərki oyunlarda top fərqi də "Neftçi"nin xeyrinədir - 63:37. Amma hazırda paytaxt klubunun heç də yaxşı günlər yaşamadığını nəzərə alsaq, "Kəpəz"i bu dəfəki qarşılaşmanın favoriti saymaq olar. Hər halda prinsipial rəqiblərin duelinin maraqlı idman mübarizəsi şəraitində keçəcəyi şübhəsizdir.

Son oyun günündə də iki qarşılaşma keçiriləcək. Öncə "İnter" səfərdə "Xəzər Lənkəran"ın qonağı olacaq. Bu, tərəflərin 35-ci dueli olacaq. Əvvəlki oyunların 13-də paytaxt klubu qalib gəlib, 15-də heç-heçə qeydə alınıb. Cənublular sadəcə, 6 qarşılaşmada 3 xalı bayram ediblər. Top fərqində də bakılılar öndədir - 39:29. Rəqiblərin son 3 matçında eyni - 2:0 hesabı qeydə alınıb. Bu üç matçda meydan sahibi olan komanda qalib gəlib. “Xəzər Lənkəran” son 5 matçda 1 dəfə qalib gəlib. Çətin günlərini yaşan cənub təmsilçisi ilə müqayisədə "İnter" indi daha inamlı təsir bağışlayır. Amma bir müddət öncə "Neftçi"yə Lənkəranda qalib gələn "ağ-yaşıllar" eyni aqibəti "İnter"ə də yaşada bilərlər.

Nəhayət, turun qapanış matçında lider "Qarabağ"ın əsas izləyicisi "Zirə" doğma meydanda AZAL-la qarşılaşacaq. Yalnız cari mövsümdə üz-üzə gələn komandaların hər iki duelinin taleyini 1 qol həll edib. Hər iki matçda meydan sahibi 1:0 hesabı ilə qalib gəlib. Bu dəfə necə olacağı maraqla gözlənilir.

Topaz Premyer Liqası
26-cı tur
18 mart (cümə)

21:00. “Rəvan” - “Sumqayıt”
Hakimlər: Rəvan Həmzəzadə, Yaşar Abbasov, İsgəndər Əliyev, Ziya Nəsirov.
AFFA nümayəndəsi: Ramiz Abdullayev.
Hakim-inspektor: Məlik Həsənov.
Bakı. "Bayıl Arena".

19 mart (şənbə)

15:00. “Qəbələ” - “Qarabağ”
Hakimlər: Əliyar Ağayev, Rza Məmmədov, Knyaz Əmiraslanov, İnqilab Məmmədov.
AFFA nümayəndəsi: Mübariz Hüseynov.
Hakim-inspektor: Füzuli Nəcəfov.
Qəbələ şəhər stadionu.

18:00. “Neftçi” - “Kəpəz”
Hakimlər: Rauf Cabbarov, Mübariz Haşımov, Coşqun Həsənov, Fariz Yusifov.
AFFA nümayəndəsi: Nüvər Xasıyev.
Hakim-inspektor: Rövşən Əhmədov.
Bakı. "Bakcell Arena".

20 mart (bazar)

13:30. “Xəzər Lənkəran” - “İnter”
Hakimlər: Ömər Paşayev, Mehman Mahmudov, Vüqar Bayramov, Mahir Məmmədov.
AFFA nümayəndəsi: Rauf Hüseynli.
Hakim-inspektor: Murad Məmmədov.
“Xəzər Lənkəran” mərkəzi stadionu.

15:30. “Zirə” - AZAL
Hakimlər: Rəhim Həsənov, Azər Əsgərov, Munis Abdullayev, Orxan Məmmədov.
AFFA nümayəndəsi: Elbrus Abbasov.
Hakim-inspektor: Fazil Mürşüdov.
Zirə İdman Kompleksinin stadionu.

Bombardirlər:
10 - Nelson Bonilya ("Zirə").
8 - Riçard Almeyda ("Qarabağ"), Dani Kintana ("Qarabağ").
7 - Ruslan Qurbanov ("Neftçi"), Aleksey Antonov ("Qəbələ").
6 - Amil Yunanov ("Sumqayıt"), Samuel Armenteros ("Qarabağ").