Musayev: Avropada özünü göstərə biləcək yeganə futbolçumuz Abdullayevdir
Azərbaycan yığmasının sabiq hücumçusu Samir Musayev milli komandamızın Türkiyə toplanışı və Qazaxıstanla yoxlama oyunu üçün açıqlanmış heyəti barədə fikirlərini bölüşüb. Azerisport.az saytına açıqlamasında o, bunları söyləyib:
"Yığmanın heyətində gözlənilməz heç nə görmədim. Çünki bizim onsuz da geniş seçim imkanımız yoxdur. Bir halda ki, millinin məşqçilər korpusu bu oyunçulara dəvət göndərib, deməli, hazırda ən layiqli olanlar bunlardır. Amma mən "Neftçi"dən Elşən Abdullayevi də bu heyətdə görmək istəyərdim. Hazırda o, Avropaya getməyə, orada özünü göstərməyə qadir yeganə futbolçumuzdur. Amma milliyə niyə dəvət edilmədiyini bilmirəm".
Musayev həmçinin Topaz Premyer Liqasının 26-cı turu çərçivəsində keçiriləcək "Qəbələ" ilə "Qarabağ" arasındakı oyun öncəsi düşüncələrini paylaşıb: "Ağdamlılar bu görüşdə qalib gəlsələr, onda bu komandanın bir rəqibi qalacaq - "Zirə". Amma çempionatına sonuna hələ 11 tur qalır. Ona görə də indidən çempionluqdan danışmaq tezdir. Həm də öncə "Qəbələ"yə qalib gəlmək lazımdır".
