Zirə də bəyanat yaydı: Hər kəsi daha diqqətli olmağa çağırırıq

Topaz Premyer Liqasını debütantı, hazırda turnir cədvəlində ikinci pillədə qərarlaşan “Zirə” bəyanat yayıb. Azerisport.az sizi həmin bəyanatla tanış edir:

"Özünü menecer kimi təqdim edən bəzi adamlar son vaxtlar klublarımız adından ölkəyə İrandan futbolçu dəvət edərək onları aldadır. Bu cür işbazlar “Zirə”nin də adından istifadə edərək qonşu ölkədən olan futbolçu və menecerləri aldadıblar. Bununla bağlı məlumat klubumuza daxil olduqdan sonra araşdırma apardıq və məlum oldu ki, iranlı futbolçudan “Zirə” ilə müqavilə qarşılığında pul alan həmin şəxslər saxta sənədlər də hazırlayıblar. Hamıya məlumdur ki, bir müddət öncə “Kəpəz” də eyni halla qarşılaşmışdı. Bu da onu göstərir ki, futbolçu və menecerlərin etibarından sui-istifadə edənlərin sayı az deyil. Belə halların qarşısını almaq üçün hər kəsi daha diqqətli olmağa və transfer məsələlərinə peşəkar səviyyədə yanaşmağa çağırırıq.
 
Bildirmək istəyirik ki, “Zirə” və digər klubların əlaqə saxlamaq, hər hansı suala aydınlıq gətirmək üçün bəlli hüquqi ünvanı, ofisi, telefon və elektron ünvanı var. İstənilən peşəkar  klubdan təklif alan futbolçu, onun meneceri rəsmi şəkildə klublarla əlaqə saxlaya və məsələni peşəkar səviyyədə araşdıra bilər".