Orxan Qurbanlı: Neftçi Dauqavadan daha adlı-sanlı klubdur
Azərbaycanlı futbolçu Orxan Qurbanlı Latviyanın "Dauqava" klubundakı debüt matçından sonra azerisport.az saytının suallarını cavablandırıb.
- Artıq Latviya çempionatında debüt matçınıza da çıxdınız. "Metta/LU" ilə (1:2) mövsümün açılış matçı barədə nə deyə bilərsiniz?
- Oyuna pis başlamamışdıq. Hesabı da biz açdıq. Amma sonradan səhvlərə yol verməyə başladıq və sonda uduzduq. Fikrimcə, kollektivimiz çox gənc və təcrübəsizdir. Çünki ikinci yarıda biz rəqibi sıxsaq, qol vəziyyətləri yaratsaq da, onlardan yararlana bilmədik. Bir qədər bəxtimiz də gətirmədi. Uduzmalı deyildik.
- İlk dəfə legioner kimi meydana çıxdığınızı nəzərə alsaq, həyəcan var idimi?
- Əlbəttə, həyəcanlı idim. Amma özlüyümdə fikirləşirdim ki, mən burada Azərbaycanı, "Neftçi"ni təmsil edirəm. İlk matç üçün pis oynamadım. Mənə qarşı münasibət də normaldır. Burada əksəriyyət rus dilində danışır ki, bu da bizim üçün rahatdır. Buna görə də uyğunlaşmaq baxımından problem olmadı.
- Komandanın bu mövsüm üçün hədəfi nədir?
- Çempionatda ilk dördlüyə düşmək. Aprel ayında Latviya kubokunun 1/4 final mərhələsinin oyunları keçiriləcək. Bu turnirdə də irəli getmək istəyirik.
- Maraqlıdır, niyə məhz "Dauqava"?
- Bu təklifi mənə futbol menecerlərindən biri etdi. "Neftçi"də elə də çox oynamaq şansı qazanmırdım. Bu üzdən də Latviyadan gələn təklifi müsbət cavablandırdım. Hesab edirəm ki, bu addımım düzgündür. Fikrimcə, burada yaxşı oyun təcrübəsi qazanacağm. "Neftçi" rəhbərliyi ilə də məsləhətləşib, "Dauqava"ya keçməyə qərar verdim. Latviya klubu da məni bəyəndiyindən, "Neftçi"yə rəsmi müraciət etdilər. "Neftçi" rəhbərliyi sağ olsun ki, bu keçidlə bağlı heç bir problem yaratmadı və məni dəstəklədilər. Halbuki, mən heç bunu gözləmirdim.
- Bakılılar sizi Latviya klubuna pulsuz buraxıb? İcarə müddəti bitəndən sonra yenidən "Neftçi"yə qayıtmaq istəyirsiniz?
- İyunun 15-nə qədər icarə əsasında burada çıxış edəcəyəm. Amma lazım gəlsə, "Neftçi"yə qayıtmaq istəyərəm. Bu transferin maliyyə tərəfini açıqlamaq istəməzdim. Bircə onu deyə bilərəm ki, "Neftçi" mənə kömək etdi.
- Latviya çempionatından tranzit kimi istifadə edib daha güclü Avropa birinciliklərinə keçməyi düşünmürsünüz?
- Hələ bundan danışmaq çox tezdir. Əlbəttə, güclü klublarda oynamağı, Azərbaycanı Avropada təmsil etməyi hər kəs istəyir. Mən də istərdim ki, "Dauqava" mənim üçün bir tramplin olsun və daha güclü çempionatda oynamaq şansı qazanım. Yaxud da daha təcrübəli futbolçu kimi "Neftçi"yə qayıdım.
- "Neftçi"nin çıxışı kənardan necə görünür?
- Mən bu komandanın çıxışını həmişə izləməyə çalışıram. Onlara uğurlar arzulayıram.
- Yəqin ki, özünüz üçün Latviya və Azərbaycan çempionatları, "Dauqava" ilə "Neftçi" arasında müqayisələr aparmısınız...
- "Neftçi" daha adlı-sanlı, titullu, maliyyə baxımından imkanlı klubdur. Əgər mən "Neftçi"də oynamaq şansı qazana bilməyib, buraya icarəyə gəlmişəmsə, deməli, hər şey aydındır. Amma burada maliyyə şərtləri nə qədər zəif olsa da, məşq etmək, inkişaf etmək üçün hər cür şərait var. Mən də, komanda yoldaşım Mirabdulla Abbasov da bütün şəraitdən razıyıq.
