Elnur Cəfərov: İspaniya klubuna keçidim yaxın günlərdə həllini tapmalıdır

"Xəzər Lənkəran"ın yarımmüdafiəçisi Elnur Cəfərovun azerisport.az saytına müsahibəsi

- İspaniyaya nə vaxt getməyi düşünürsünüz?
- Fikrimcə, "Real Ovyedo"ya keçidim tezliklə baş tutacaq. Amma bir qədər gözləməliyəm. Yaxın günlərdə "Xəzər Lənkəran"la bu keçidin bütün detallarına aydınlıq gəlməlidir.

- Nə əcəb ispanlar azərbaycanlı futbolçunu belə bəyənib, klublarında görmək istədilər?
- (gülür) Bir həftəlik məşqlər zamanı onların xoşuna gəldim. Klubun gənclərdən ibarət məktəbinin direktoru mənim oyunum barədə müsbət fikirlər söylədi. O dedi ki, mənim əsas komandada oynamaq üçün böyük şansım var.

- Amma yəqin ki, bu mövsüm yox...
- Bəli, bu mövsüm sözügedən komandada oynamaq mümkün olmayacaq. Amma oyun təcrübəsi baxımından problem olmayacaq. Əvəzedici heyətdə meydana çıxacağam.

- Yeri gəlmişkən, hazırda formanızı qorumaq üçün nə edirsiniz? Çünki sizin "Xəzər Lənkəran"la məşq etmədiyinizi bilirik...
- Fərdi qaydada hazırlaşmaqla formamı qorumağa çalışıram. Dəniz kənarında məşq edirəm, daha çox fiziki hazırlığa diqqət ayırıram.

- Bəs oyun təcrübəsi baxımından?
- Topla da məşq edirəm. Daha çox futbol oynamağa çalışıram.

- Martın 24-də Azərbaycanın U-21 yığmasını AÇ-nin seçmə mərhələsi çərçivəsidə Rusiya ilə oyun gözləyir. Həmin toplanışa siz də dəvət alacaqsınız?
- Dəvət alacağam. Rusiyaya qarşı oynamalıyam. Ona görə də öz üzərimdə səylə məşq edirəm.

- Amma iki ay peşəkar futbol oynamadan sizə çətin olacaq...
- Fikrimcə, bu baxımdan problem olmayacaq. Rusiya ilə oyun üçün məndə güc var. Həm də yanvar ayında komanda ilə yaxşı toplanış keçdik. Bu, bizim üçün vacib oyundur. Yaxşı oynayıb, müsbət nəticə qazanmalıyam.