Kəpəz Müstəqil fan klubu matç zamanı təhqirlərə qarşıdır
"Kəpəz"in eyniadlı müstəqil fan klubu redaksiyamıza müraciət göndərib. Azerisport.az xəbər verir ki, gəncəli fanatların müraciətində bunlar qeyd olunub:
"Kəpəz"in demək olar ki, ev oyunlarının əksəriyyətində xanım azarkeşlərə təsadüf olunur. Əks cinsin nümayəndələri ilə yanaşı, xanım fanatların da komandamıza dəstək olması klubun üzvləri kimi, bizi - "Kəpəz Müstəqil Fan Klubu"nu da sevindirir. Zərif azarkeş nümayəndələrinin sırf Gəncə şəhər stadionunda olsa belə, daim komandamıza dəstəyinin şahidi olmaq üçün fan klub olaraq, ümumilikdə "Kəpəz" fanatlarından tək ev oyunlarında deyil, səfər oyunlarının gedişatında da, baş verən bir çox məqamlarda emosiyalarına hakim olub, təhqirə yol verməmələrini rica edirik. Unutmamalıyıq ki, klubun səfər oyunları sözügedən xanım azarkeşlər tərəfindən televiziya vasitəsilə də birbaşa izlənilir və oyunboyu fanatlar tərəfindən səslənən ifadələr şərhçilərin səsinin fonunda olsa belə, aydin eşidilir. "Kəpəz" azarkeşlərinin nüfuzuna bir qədər xələl gətirən bu cür halların növbəti matçlarda təkrarlanmamasını diləyirik".
