Nikolas Kanales: AZAL-la heç-heçə bizi qane etmədi
"Neftçi"nin hücumçusu Nikolas Kanales Topaz Premyer Liqasının 25-ci turu çərçivəsində AZAL-a qarşı keçirdikləri oyundan (1:1) sonra azerisport.az saytının suallarını cavablandırıb.
- "Neftçi" yenə qələbə qazana bilmədi. Oyunla bağlı nə düşünürsünüz?
- Nəticə, təbii ki, gözlədiyimiz kimi olmadı. Qələbə qazanmalı idik. Bunun üçün qol şanslarımız da oldu. Heç-heçə bizi qane etmədi.
- Qazonun süni örtüklü olması sizinlə müqayisədə rəqib üçün əlavə üstünlük yaratmırdı?
- Şəxsən mənim üçün bunun heç bir problemi yoxdur. Amma ola bilər ki, AZAL bu baxımdan müəyyən üstünlüyə malik olsun.
- Vurduğunuz qol barədə nə deyə bilərsiniz?
- Qol vurduğum üçün şadam. Bir neçə ay idi ki, qol vura bilmirdim. Bu da məndə təzyiq yaradırdı. Fikrimcə, bundan sonra hər şey yaxşı olacaq.
- Əvvəlki Kanalesin qayıtdığını demək olar?
- Elə də demək olar. Bu, mənim matçdakı yeganə qol şansım idi, ondan da yararlandım.
- Xəbəriniz var ki, siz bu gün "Neftçi"nin Azərbaycan çempionatlarındakı 1200-cü qolunu vurdunuz?
- Əlbəttə, belə tarixi bir qolun müəllifi olmaq çox xoşdur. Ümid edirəm ki, bundan sonra da qollar vuracağam.
- "Neftçi" həmişə çempionluq uğrunda mübarizə aparıb. Komandanın indi yeddinci yerdə olması sizə qəribə gəlmir?
- Əlbəttə. Əvvəlki mövsümlərlə müqayisədə fərq böyükdür. Problemlərlə üzləşən tək "Neftçi" deyil. Maliyyə problemi bütün ölkədə hökm sürür. Klubumuz bu vəziyyətə uyğunlaşıb, maksimum nəticə üçün mübarizə aparmalıdır.
- Meydanda Flavinyo və Julius Vobay kimi futbolçular üçün darıxmırsınız?
- Onlar üçün darıxıram (gülür). İki il əvvəl həmin uşaqlarla birgə oynayırdım. Onlarla az uğurlar qazanmamışıq.
- Yəqin ki, Premyer Liqada bu mövsüm ciddi uğur qazana bilməyəcəksiniz. Bəs kubokdakı şanslarınızı necə qiymətləndirərdiniz? Yarımfinalda "Qəbələ"ni keçə biləcəksiniz?
- Hər kəs öz şansından yararlanmağa çalışır. Yarımfinalda bizi iki oyun gözləyir. Finala vəsiqə qazanmaq lazımdır.
