Rəşad Qasımov: Tezliklə bütün borcları bağlayacağıq
"İnter"in prezidenti Rəşad Qasımov bu gün klub saytının yenilənmiş versiyasının təqdimat mərasimində çıxış edib. Azerisport.az xəbər verir ki, o, öncə Topaz Premyer Liqasının 25-ci turu çərçivəsində "Rəvan"a qarşı keçirəcəkləri oyundan danışıb:
"Rəvan"la görüşdə asan oyun gözləmirik. Kubokda onların bizə qarşı necə mübarizə apardığını hamı gördü. Amma "İnter" sabah da öz oyununu göstərməyə çalışacaq. Matç ərəfəsində heyətimizdə ciddi itki var. Nizami Hacıyev təxminən 20 günlük sıradan çıxıb".
Klub prezidenti kubokun yarımfinalında "Qarabağ"a rəqib olmalarından da söz açıb: "Qarabağ"la düşməyimizə çox sevindim. Bizim onlarla oyunlarımız yaxşı alınır. Ardıcıl üçüncü dəfədir "Qarabağ"la oynayacağıq. Bu, Azərbaycan futbolu üçün əsl bayram olacaq. Bilet satışı barədə düşünürük. Amma tribunaların dolmasını da istəyirik".
Klubun keçmiş futbolçularına olan borcları barədə danışan Qasımov bunları vurğulayıb: "Həmin oyunçularla 99 faiz razılığa gəlmişik. Yaxın zamanda həmin borcları tam bağlayacağıq".
