Adil Şükürov: Zirənin avrokuboklara buraxılmaması faciə olmayacaq
"Zirə"nin baş məşqçisi Adil Şükürov Topaz Premyer Liqasının 25-ci turu çərçivəsində "Qəbələ"yə qarşı keçirəcəkləri səfər oyunu öncəsi azerisport.az saytının suallarını cavablandırıb.
- Komanda kubokdakı "Qəbələ" məğlubiyyətindən sonra özünü necə hiss edir?
- Komandanın toparlanması üçün əlimizdən gələni edirik. Bu rəqibə qarşı Premyer Liqa matçına kimi hazır olmalıyıq. Xüsusi bir problem görmürəm. Kubokdakı məğlubiyyəti nə dərəcədə unutduğumuzu isə oyunda görəcəyik.
- Hər halda psixoloji baxımdan hansısa problem hiss oluna bilər...
- Belə problem ola bilər. Amma 1:5 hesablı məğlubiyyət həm də bizim üçün əlavə bir motivasiyadır.
- Niyə "Qəbələ" ilə cavab matçına optimal heyət buraxmamışdınız? Bu, Premyer Liqanın sizin üçün kubokdan daha çox önəm daşıdığının göstəricisidir?
- Kubok da bizim üçün önəmli idi. Amma biz futbolçularımızın gücünü də nəzərə almalıyıq. Bu üzdən də bəzi oyunçularımıza istirahət hüququ qazandırmışdıq. Kiçik zədəsi olanlar da var idi. Eyni futbolçuları hər görüşdə meydana buraxa bilmərik.
- "Qəbələ" ilə qarşıdakı oyundan nö gözləyirsiniz?
- Bu komanda turnir cədvəlindəki əsas izləyicimizdir. Hədəfimiz mövqeyimizi qorumaqdır. Şübhəsiz ki, "Qəbələ" kubokdakı qələbədən daha da ruhlanıb, çempionatda da uğur qazanmaq istəyəcək. Amma biz də həmin məğlubiyyətdən dərs çıxarmışıq.
- Ötən gün UEFA-nın baş katibi funksiyasını yerinə yetirən Teodor Teodoridis "Zirə"nin avrokuboklara buraxılmamasının mümkünlüyünü açıqladı...
- O, bəyan edib ki, istisna kimi müəyyən nüanslar var. Biz də həmin nüanslardan yararlanmağa çalışmalıyıq. Biz avrokuboklara vəsiqə qazansaq, iştirakımıza icazə verilməsə də belə, bunu faciəyə çevirməməliyik. Biz hazırda gələcək üçün güclü komanda yaratmağa çalışırıq. Ona görə də avrokuboklara buraxılmamağımız faciə olmayacaq.
- Siz buna hazırsınız. Bəs futbolçular?
- Biz bu heyəti toplayanda heç avrokuboklara vəsiqə qazanmaqdan söhbət də getmirdi. Hədəfimiz güclü komanda yaratmaq idi. Məncə, avrokuboklara buraxılmamağımız növbəti mövsüm üçün bizdə əlavə motivasiya yarada bilər. Biz hələ Premyer Liqadakı ilk mövsümümüzü keçiririk. Hələ yolun başlanğıcındayıq.
