Sadıqlı: Düzgün hakimlik olsaydı, Neftçi bizə qalib gələ bilməzdi
"Xəzər Lənkəran"ın qapıçısı Orxan Sadıqlı Azərbaycan kubokunun 1/4 final mərhələsi çərçivəsində "Neftçi"yə qarşı keçirdikləri cavab matçından (0:2, ilk oyun - 3:2) sonra jurnalistlərin suallarını cavablandırıb. Azerisport.az sizi həmin açıqlamalarla tanış edir.
- Oyunla bağlı fikirləriniz...
- "Neftçi" ardıcıl dörd oyun idi uduzurdu və hamı deyirdi ki, guya onları hakim uduzdurur. Bu gün hakimləri gördünüz. Penalti epizoduna diqqətlə baxın. Mən də həmin epizoda baxacağam. İbrahim Qədirzadəyə qarşı qayda pozuntusu var idi. Belə olmaz. Uşaqların bütün əziyyətini yerə vurdular. "Neftçi" bizi ancaq belə məğlub edə bilərdi. Amma belə futbol oynamaq, belə hakimlik etmək olmaz. Biz Lənkəranda açıq futbol sərgilədik, qələbə qazandıq. Qoy penalti epizoduna Xaqani Məmmədov da baxsın. Hakim bu həyatda bunu edə bilər, amma o biri dünyada hər şeyə görə cavab verməli olacaq.
- Bakıdakı oyunda fərqli motivasiya və atmosfer var idi...
- Komandamızda 18 futbolçu var. Onun 11-i oynayır, 3-ü sonradan meydana çıxır. Gücümüz yetdiyi qədər oynayırıq. Hakimlər oyunları düzgün idarə etsələr, biz də uğur qazana bilərik. Bizim klubu güclü olduğu dövrlərdə də sıxıblar, indi də sıxırlar.
- Sizcə, "Neftçi"yə bu gün hakimlər kömək etdi?
- 100 faiz kömək etdilər. Amma qapımıza təyin olunan penalti ədalətli idi. Epizod göz qabağında idi. Sadəcə, həmin epizoddan əvvəl Qədirzadəyə qarşı kobudluq var idi. 22 yaşım var. 400-500 manatlıq iş tapa bilsəydim, futboldan gedərdim. Belə şeylərdən yorulmuşam.
- "Neftçi" tərəfi isə iddia edir ki, birinci hissədə top Nodar Məmmədovun əlinə dəymişdi...
- Bəli, orada da penalti var idi. Hakim bütövlükdə səhv qərarlar qəbul etdi.
- Sizcə, bu səhvlər qəsdən idi?
- Hər kəsin öz vicdanı var. Biz əziyyət çəkirik, niyə bu əziyyətimizi kimsə yerə vurmalıdır? Düzgün hakimlik olsa, "Neftçi" bizə qalib gələ bilməz. Düzgün olan hakimlər də var. Rəhim Həsənov niyə penaltidən öncə qayda pozuntusunu qeydə almadı? "Xəzər Lənkəran" kimin üçün oynayır? Bu da Azərbaycan klubudur, bu ölkə üçün oynayır. Hər klubun maliyyə problemi var. Hər şey qaydasında olsaydı, biz yarımfinala çıxardıq. Bizdən fərqli, "Neftçi"nin 25 nəfərlik, güclü heyəti var.
- Kubok sizin üçün güclü motivasiya idi. Bəs bundan sonrakı oyunlara hansı motivasiya ilə çıxacaqsınız?
- Kubokda mübarizəni davam etdirmək istəyirdik. Əlbəttə, heç kim bizim kuboku qazanacağımıza inanmırdı. Qarşıdakı oyunlara köklənməyimiz çətin olacaq. Amma davam etmək lazımdır.
- Paytaxt klubunun azarkeşləri ilə problem olmadı?
- Xeyr, mənim ünvanıma təhqir olmadı. Mən nə rus, nə də erməni deyiləm ki, təhqir etsinlər. Onsuz da bizim üzümüzə heç nə deyən olmur. Amma arxamızca danışa bilərlər.
