Ermin Zets: Qəbələ artıq qara zolaqdan çıxıb
"Qəbələ"nin hücumçusu Ermin Zets Topaz Premyer Liqasının 24-cü turunun "Neftçi" ilə oyunundan (2:1) sonra azerisport.az saytının suallarını cavablandırıb.
- "Qəbələ" son turda ilk yarıda məğlub duruma düşdüyü "Neftçi" ilə oyunda əzmkar qələbə qazandı. Bu oyunla bağlı fikirləriniz...
- Biz oyuna pis başladıq. Düzdür, birinci hissədə də qol epizodlarımız oldu, amma fərqlənə bilmədik. Fasilədən sonra isə hücumlarımızın kəsərini daha da artırdıq. Fikrimcə, layiqli qələbə qazandıq. Çünki sonadək mübarizə apardıq.
- "Qəbələ" son beş oyunda 13 xal toplayıb. "Qara zolaq"dan çıxdığınızı demək olar?
- Mən də "qara zolaq"dan çıxdığımızı düşünürəm. Bunun davamını gətirmək istəyirik. Hər oyuna qələbə qazanmaq istəyi ilə çıxırıq.
- Sabah sizi "Zirə" ilə ölkə kubokunun 1/4 final mərhələsinin cavab oyunu gözləyir. İlk oyunda səfərdən 2:1 hesablı qələbə ilə qayıtdığınızı nəzərə alsaq, cütün taleyini həll etdiyinizi demək olar?
- Hələ hər şeyin həll olunduğunu düşünmürəm. Cavab oyunu da var. Düzdür, yarımfinala çıxmaq şansımız çoxdur. Qələbə qazanmaq üçün əlimizdən gələni edəcəyik.
- "Zirə"ni keçəcəyiniz halda, yarımfinalda "Neftçi" - "Xəzər Lənkəran" cütünün qalibi ilə qarşılaşacaqsınız. Onlardan hansı ilə üz-üzə gəlmək istəyərdiniz?
- Hələ bu barədə düşünmürük. Yarımfinala çıxaq, sonra kiminlə oynayacağımıza baxarıq.
- Qış fasiləsindən sonra siz hücumun sivri ucunda daha çox yer almağa başlamısınız. Artıq komandanın əsas hücumçusunun Aleksey Antonov yox, siz olduğunuzu demək olar?
- Hər şeyə Roman Qriqorçuk qərar verir. Mən bircə onu bilirəm ki, hazırda əsas heyətdə oynayıram.
- "Qəbələ"nin çempionluq şansları barədə nə düşünürsünüz?
- Hər şey mümkündür. Qarşıda xeyli oyun var. Bütün oyunlarda qələbə qazanamaq istəyirik ki, çempionluq şanslarımızı artıraq.
- Mövsümün sonunda "Qəbələ"də qalmaq istəyirsiniz, ya karyeranızı xaricdə davam etdirmək fikriniz var?
- Burada hər şey yaxşıdır. Ona görə də digər klublar barədə düşünmürəm. "Qəbələ" üçün əlimdən gələni edirəm. Çempionat bitəndən sonra necə olacağına baxarıq.
- Türkiyənin "Balıkəsirspor" klubundan borcunuzu aldınız?
- Hələ yox, gözləyirəm.
