Aqil Məmmədov: Orada qayda pozuntusu yox idisə, futboldan getməyə hazıram
"Neftçi"nin qapıçısı Aqil Məmmədov Topaz Premyer Liqasının 24-cü turu çərçivəsində "Qəbələ"yə 1:2 hesabıyla uduzduqları oyundan sonra jurnalistlərin suallarını cavablandırıb. Azerisport.az sizi həmin açıqlamalarla tanış edir.
- Matçla bağlı fikirləriniz?
- Mənim baş hakim Ömər Paşayevə sözüm yoxdur. Bu işi bacarmırsansa, get özünə başqa sənət tap. Daha nə deyim?
- Siz hansı epizoddan narazı qalmısınız ki?
- Birinci hissədə məni bir neçə dəfə vurdular. Məni üç dəfə vuran futbolçuya hakim sarı vərəqə göstərməməlidir?
- Dodonu nəzərdə tutursunuz?
- Məni vuran futbolçu qayda pozuntusu olduğunu özü dedi. Hətta əlavə etdi ki, mən nə edə bilərəm? Bəli, Dodo özü bunu dedi. O, mənim əlimə zərbə endirmişdi. Mən səhv etsəydim, etiraf edərdim. Bəs qapıçı zonası nə üçündür? Paşayev ki bunu yaxşı bilir. Amma "sağ olsun", heç bir hakim hansısa oyunda belə dönüş yarada bilməzdi, o etdi. Ona minnətdaram. Başqa heç nə. Yəni "Neftçi"ni "sındırmaq" bu qədər asandır?
- İkinci hissədə laynsmana yaxınlaşıb nə dediniz?
- Baş hakim görmürsə, köməkçisi görməlidir. Qaydaları bilmirlərsə, meydanda nə işləri var? Yan xətt hakimləri baş hakimə kömək etmək üçündür. Bunu bacarmırlarsa, bura niyə gəlmişdilər? Qoy məndən incisinlər. Amma mən həqiqəti deyirəm. Bacarmırsansa, bu işdən əl çəkməlisən.
- Birinci hissədə üstünlük sizdə idi. İkinci hissədəki zəif çıxışınızın səbəbi təkcə hakimlərin sizi sıxmasından qaynaqlanırdı?
- Təkcə bu matçın ikinci hissəsində yox, ümumiyyətlə üçüncü dövrə başlayandan hakimlər rəqiblərimizin qapısına penalti təyin etmirlər, qırmızı vərəqə göstərmirlər. Amma bizim ya futbolçumuzu meydandan qovurlar, ya da oyunumuzu "sındırırlar". Bu matçda da Paşayev açıq-aşkar "Qəbələ"yə "işlədi".
- Sizcə, "Neftçi"nin ardıcıl dördüncü məğlubiyyətlə üzləşməsi ancaq hakimlərin günahı ucbatındandır? Futbolçuların səhvləri yoxdur?
- Əlbəttə, biz də səhvlərə yol veririk. Demirəm ki, bizim səhvimiz yoxdur. Amma bizim oyunumuzu bu qədər "sındırmaq" lazım deyil. Çünki bütün bunlar Azərbaycan çempionatının səviyyəsini aşağı salır.
- Əsgər Abdullayevin istefası barədə nə düşünürsünüz?
- O, bizimlə sağollaşmağa gəlmişdi. Mənə pis təsir etdi.
- Sizcə, bu, nəyi dəyişəcək?
- Bu, klub rəhbərliyinin qərarıdır. Əsgər Abdullayevə uğurlar arzulayıram. Onun heç bir günahı yoxdur. Biz üçüncü dövrəyə yaxşı hazırlaşmışdıq. Sadəcə, bizə qarşı təzyiqlər çoxdur. Düzdür, "Qəbələ" bu gün layiqli qələbə qazandı. Amma onlar olmasaydı da, Ömər Paşayev bizi uduzduracaqdı. Qoy gəlsinlər, faktlarla danışaq. Əgər ilk qolda qayda pozuntusu yox idisə, əlcəklərimi bir kənara atıb, futboldan gedərəm.
- "Xəzər Lənkəran"la ölkə kubokunun 1/4 final mərhələsinin cavab matçına hansı əhval-ruhiyyədə çıxacaqsınız?
- Bizim bu oyuna ümidimiz var. Əlimizdən gələni edəcəyik.
