Emin Nuri Kalmara qələbə qazandıran ötürmə ilə diqqət mərkəzinə düşdü

İsveç kubokunda qrup mərhələsinin sonuncu - üçüncü turunun oyunları keçirilib. Azerisport.az xəbər verir ki, Azərbaycan yığmasının sabiq müdafiəçisi Emin Nurinin komandası - "Kalmar" da kubokda növbəti görüşünə çıxıb.

Sözügedən komanda 4-cü qrup çərçivəsində səfərdə "Elfsborq"la qarşılaşıb. Oyun futbolçumuzun komandasının 1:0 hesablı qələbəsi ilə başa çatıb. Nuri start heyətdə çıxdığı bu görüşdə sonadək meydanda olub. O, matçdakı yeganə qolun da ötürməsini edib ki, İsveç mətbuatı futbolçumuzun bu uğurunu xüsusi qabardıb.

Bu qələbə sayəsində futbolçumuzun komandası qrupunu 9 xalla vahid lider kimi başa vurub. Xatırladaq ki, "Kalmar" kubokun ilkin təsnifat mərhələsində "Halmia" ilə duellərdən qalib ayrılmışdı (1:1, 4:2). Qrup mərhələsindəki ilk oyununda "Varnamo" üzərində 2:1 hesablı qələbə qazanan Nurinin komanda yoldaşları ardından da "Assiriska"nı 3:1 hesabıyla məğlub etmişdi. Bu qələbələr sayəsində "Kalmar" adını növbəti mərhələyə yazdırıb.