Qurban Qurbanov: Mahir Mədətov istəkli olsa da, çatışmazlıqları çoxdur
"Qarabağ"ın baş məşqçisi Qurban Qurbanov Topaz Premyer Liqasının 24-cü turu çərçivəsində "Zirə"yə qarşı keçirdikləri oyunu şərh edib. Azerisport.az xəbər verir ki, Ağdam klubunun çalışdırıcısı 2:0 hesabıyla bitən qarşılaşmadan sonra bunları söyləyib:
"Vacib nəticədir. Çox intizamlı komandaya qarşı oynayırdıq. Onlar hətta hesabda geridə olduqları halda da öz oyun üslublarından əl çəkmirdilər. Futbolçularımız isə ən azı hesabı qorumaq üçün var güclərini sərf edirdilər. "Zirə" sonadək mübarizə aparan komandadır. Buna baxmayaraq, biz ikinci qolu da vurduq. Bu oyunda bizi dəstəkləyən azarkeşlərə də təşəkkürümü bildiriəm.
Futbol elə bir oyundur ki, məğlubiyyət istənilən an baş verə bilər. Biz də məğlubiyyətdən sığortalanmamışıq. Qarşıda bizi ağır oyunlar gözləyir. Həmin görüşləri düşünməliyik.
Mahir Mədətova gəlincə, onun əsas üstünlüyü istəkli olmasıdır. Amma çatışmazlıqları da çoxdur. Öz üzərində daha çox çalışması, futbolu düşünməsi lazımdır. Hələ gəncdir və fiziki cəhətdən geri qalır.
"Qalatasaray"la oyun barədə hələ dəqiq bir məlumat yoxdur. Futbolçulara, klubdakılara da tapşırmışam ki, Türkiyə klubu ilə oyunla bağlı mümkün qədər az danışılsın. Futbolçular indidən bu oyunun ajiotajının təsiri altına düşsələr, çempionat görüşlərini unuda bilərlər". (CBC)
