Çimezi Mbah: Qarabağla matça qələbə üçün çıxacağıq
"Zirə"nin müdafiəçisi Çimezi Mbah Topaz Premyer Liqasının 24-cü turu çərçivəsində "Qarabağ"a qarşı keçiəcəkləri oyun öncəsi azerisport.az saytının suallarını cavablandırıb.
- "Qəbələ"yə qarşı keçirdiyiniz uğursuz kubok matçından (1:2) sonra sizi indi də "Qarabağ"la çempionat oyunu gözləyir...
- "Qarabağ" kimi rəqiblərlə oyunlara xüsusi hazırlaşmaq lazımdır. Fikrimcə, biz sayıqlığı itirməmişik və qarşıdakı oyunda qələbə üçün mübarizə aparacağıq.
- Reynaldonun yoxluğunda "Qarabağ"ın hansı futbolçusundan ehtiyatlanırsınız?
- Düşünmürəm ki, Reynaldonun olmaması bizim üçün hansısa üstünlükdür. Çünki bu komandanın başqa futbolçuları da var.
- "Qəbələ" ilə görüşdəki məğlubiyyətinizə nə səbəb oldu?
- Sadəcə, futbolda qələbələr də olur, məğlubiyyətlər də. Fikrimcə, biz matçdan matça daha da inkişaf edirik. Səhvlərimiz üzərində də çalışırıq. Bu məğlubiyyət hələ yarımfinala çıxmaq şansımızı əldən verməyimiz anlamına gəlmir. Çünki qarşıda cavab oyunu da var. Ümidimizi itirməmişik. Komandamıza, uşaqlara, məşqçilərə güvənirəm.
- Amma istənilən halda ev oyununda iki qol buraxdınız ki, bu da "Qəbələ"nin mərhələ keçmək şansının daha çox olduğundan xəbər verir...
- Əlbəttə, evdə uduzmaqla öz işimizi xeyli çətinə saldıq. Amma ola bilsin ki, biz səfərdə ev oyunu ilə müqayisədə öz şanslarımızdan daha yaxşı yararlanaq və qələbə qazanaq. Bu bizim kubokda yolumuzu davam etdirməyimizə kömək edəcək.
- Bu mövsüm "Qəbələ" ilə çempionat oyunlarında 4 xal qazanmısınız. Kubok görüşü həmin oyunlardan nə dərəcədə fərqli oldu?
- Biz həmişə komanda oyunu sərgiləməyə çalışırıq. Amma bəzən yorğunluq hər oyuna xüsusi köklənməyə imkan vermir. Bir daha təkrar edirəm ki, biz hələ yarımfinala çıxmaq şansımızı itirməmişik və mübarizəni sonadək davam etdirəcəyik.
- Son dövrlər "Zirə"nin İngiltərənin "Lester Siti" klubu ilə müqayisə edənlər çoxalıb. "Lester" İngiltərə Premyer Liqasının qalibi olmağa yaxındır. Bəs "Zirə"nin çempionluq şansı nə dərəcədə yüksəkdir?
- Futbolda hər şey ola bilər. Ola bilər ki, biz də Azərbaycan çempionu adını qazanaq. Bizim çempion olmağımızda təəccüblü heç nə yoxdur. Çünki heyətimizdə bacarıqlı, istedadlı futbolçular var. Fikrimcə, bu mövsüm qızıl medalları qazanmaq bizim üçün çətin olmaz.
