Andrey Mureşan: Başa düşə bilmirəm ki, Xəzər Lənkəranda nə baş verir

"Xəzər Lənkəran"ın sabiq müdafiəçisi, hazırda Rumıniyanın "Kluj" klubunda çıxış edən Andrey Mureşan cənub təmsilçisində çıxış etdiyi günləri xatırlayıb. Azerisport.az saytına açıqlamasında o, bunları söyləyib:

"Topaz Premyer Liqasındakı nəticələri hər həftə izləyirəm. "Xəzər Lənkəran"ın uğursuz nəticələri məni çox məyus edir. Orada nə baş verdiyini başa düşmürəm. Başqa klublar yaxşı transferlər edirər, amma "Xəzər Lənkəran" heç nə ilə yadda qalmır. Ümid edirəm ki, bu vəziyyət düzələr.

Azərbaycan kuboku çərçivəsində "İnter"ə qarşı keçirdiyimiz oyunu unuda bilmirəm. Azarkeşlərimiz həmin oyunda möhtəşəm idilər. Onlar gördüyüm ən yaxşı azarkeşlərdir. Lənkəranlı fanatlar üçün "Xəzər Lənkəran" böyük əhəmiyyət daşıyır".