Svanadze: İşimdən razı qalmasalar, mövsümün sonunda İnterdən ayrıla bilərəm
"İnter"in baş məşqçisi Zaur Svanadze Topaz Premyer Liqasının 24-cü turu çərçivəsində "Sumqayıt"a qarşı keçirəcəkləri oyun öncəsi azerisport.az saytının suallarını cavablandırıb.
- Öncə "Rəvan"a qarşı keçirdiyiniz son kubok oyunundan danışaq. Niyə "İnter" bu oyunda məğlubiyyətlə üzləşdi?
- Kubok matçına ciddi köklənmişdik. Rəqib bizim qapımıza cəmi üç zərbə endirdi, onlardan da ikisi qolla nəticələndi. Zəif oynadığımızı düşünmürəm. Üstünlüyümüz var idi. Çoxlu qol vəziyyəti yaratdıq. Sadəcə, bəxtimiz gətirmədi.
- Bu məğlubiyyətdən sonra sizin "İnter"in baş məşqçi postundan uzaqlaşdırılacağınıza dair xəbərlər yayılmağa başladı...
- Bu barədə heç nə eşitməmişəm. Mənə heç kim heç nə deməyib. Mövsümün sonunda mənim işimdən razı olmasalar, müqaviləni yeniləməyə bilərlər. Belə xəbərlər indi niyə ortaya atılıb, başa düşə bilmirəm.
- Məşqçini hətta mövsümün qızğın vaxtında da qova bilərlər...
- Onda bütün amilləri, klubun üzvləşdiyi problemləri də nəzərə almaq lazımdır. Komandamıza, heyətimizə baxın. Biz hətta normal əvəzetmə də edə bilmirik. Ehtiyat oyunçular skamyasında bircə gəncimiz var.
- Yəqin ki, bu mənada büdcənin azlığını da qeyd etmək olar...
- Təbii ki. "İnter" hazırda son illərin ən az büdcəsinə malikdir. Heyətdə yer alan 8-9 aparıcı futbolçu komandanı tərk etdi. Əvəzində isə az oyunçu aldıq. Belə komandada çalışmaq asan deyil. Amma biz hər şeyə rəğmən, işimizi davam etdiririk.
- Sizin yerinizə Kamal Quliyevin gətiriləcəyi bildirilir...
- Mən bu barədə heç nə bilmirəm. Klub rəhbərliyi mənə heç nə deməyib.
- "Sumqayıt"la qarşıdakı oyundan nə gözləyirsiniz?
- Çətin oyun olacaq. Hazırlaşırıq. Heyətimizdə itkilər var. Bu baxımdan cari mövsümdə qətiyyən bəxtimiz gətirmir.
- Rəqib komanda da qış fasiləsindən sonra uğursuz çıxış edir...
- "Sumqayıt"ın yaxşı, çalışqan kollektivi var. Sürətli oyunçulara malikdir. Sıradan rəqib deyil. Bu komandaya qalib gəlmək çətin olacaq.
- Yəqin ki, "İnter"in bu oyunda xal itirməsi planlarınıza daxil deyil...
- Əlbəttə, elədir. Hər oyunda xal itirməyi düşünmürük. Qarşıdakı görüş də istisna deyil.
- Komandanızı bu matçın favoriti saymaq olar?
- Favorit olduğumuzu deməzdim. Səfərdə oynayacağıq. Rəqibə hörmət edirik. Amma kimsə bizi favorit sayırsa, bu yaxşıdır.
