Tural Qürbətov: Neftçini keçəcəyimizə inanırıq, yaxşı mükafat var
"Xəzər Lənkəran"ın hücumçusu Tural Qürbətov Azərbaycan kubokunun 1/4 final mərhələsi çərçivəsində "Neftçi" üzərində qələbə qazandıqları (3:2) ilk oyundan sonra azerisport.az saytının suallarını cavablandırıb.
- Komandanızın "Neftçi" üzərində qələbəsini demək olar ki, heç kim gözləmirdi...
- Ola bilər ki, çox adam inanmırdı. Amma komandamız və fanatlarımız qələbəyə inanırdı. Biz bu matça yaxşı köklənmişdik. Buna görə də qalib gəldik.
- Komanda yoldaşlarınız bu oyuna kubokun final maçtına çıxırmış kimi yanaşdıqlarını deyirdilər...
- Biz hamımız kubokun finalında oynamağı çox istəyirik. Bunun üçün sonadək mübarizə aparacağıq.
- Erkən qollarla 2:0 önə keçsəniz də, üstünlüyünüzü qoruya bilmədiniz. Həyəcan var idi, ya təcrübə çatışmadı?
- Oyunda temp çox yüksək idi. Səhvlər buraxdıq və rəqib də bundan yararlanıb, hesaba tarazlıq gətirdi.
- Qollardan birini də siz vurdunuz...
- Şadam ki, belə bir oyunda qol vurdum. Yenə fərqlənə bilərdim. Amma alınmadı.
- Oyundan öncə bu rəqib üzərində qələbə qazanacağınız halda mükafat söz verildiyi söylənilirdi. Aldınız?
- Bəli, bizə qələbə müqabilində mükafat söz verilmişdi. Amma hələ həmin mükafatı almamışıq. Çünki mükafat sadəcə, bir oyun üçün yox, yarımfinala çıxmaq üçün nəzərdə tutulub. Mükafatın məbləğini deyə bilmərəm. Amma çox yaxşı mükafatdır.
- 3:2 hesablı qələbə "Xəzər Lənkəran"ın yarımfinala çıxmasına bəs edəcək?
- Cavab matçı çətin olacaq. Amma biz "Neftçi"ni keçəcəyimizə inanırıq.
- "Xəzər Lənkəran"ın bir müddət öncə uduzduğu "Neftçi"dən qisasını aldığını demək olar?
- Hələ revanşdan danışmaq tezdir. Əksəriyyət bizim haqda mənfi fikirdədir. Amma biz öz oyunumuzla onlara cavab verdik.
- Maraqlıdır, 12 oyundur qol vura bilməyən komanda birdən-birə üç qol vurur...
- Əsas odur ki, ən vacib oyunda fərqləndik. Bundan sonra da qollar vuracağıq.
- Yarımfinalda hansı komanda ilə qarşılaşmaq istəyərdiniz?
- Mənim fikrimcə, "Qəbələ"nin yarımfinala çıxmaq şansı daha böyükdür. Yarımfinala çıxsaq, işimiz daha çətin olacaq.
