Bəhmən Həsənov: Hakimlər matçı normal idarə etsə, 1-2 komandadan başqa, bizi heç kim məğlub edə bilməz
Azərbaycan Kubokunun 1/4 final mərhələsinin ilk oyunu çərçivəsində baş tutan "Rəvan” – "İnter” görüşü meydan sahiblərinin 2:1 hesablı qələbəsi ilə yekunlaşdı. Azerisport.az xəbər verir ki, "aslanlar”ın baş məşqçisi Bəhmən Həsənov oyundan sonra təşkil olunan mətbuat konfransında əzmkarlığa görə futbolçulara təşəkkür edib:
"Qalib gəldiyimiz üçün çox şadam. Sərgilədikləri oyuna görə futbolçularıma təşəkkür edirəm. Bu gün hakimlərə də təşəkkür edirəm. Referilər matçı normal idarə etsə, 1-2 komandadan başqa, bizi heç kim məğlub edə bilməz. "İnter” yüksək səviyyəli, mobil komandadır. Növbəti matç çətin olacaq. Komandaların şansları barədə suala "Kəpəz”ləçempionat oyundan sonra cavab verə bilərəm. Futbolçularımızın çoxu xəstələnib. Həftəsonu keçiriləcək matçda da itkilərlə üzləşə bilərik. Yəni, gələn həftə cavab matçında "İnter”ə qarşı hansı futbolçularla çıxacağımı bilmirəm. Heyətimiz kasaddır, seçim imkanımız olduqca azdır. Bizim əsas hədəfimiz Premyer Liqada mövqeyimizi qorumaqdır. Heç-heçələrlə qurtarmışıq. Bir xal işimizə yaramır. Ya 3 xal, ya da heç nə. 0:1 uduzmaqla, 0:5 uduzmaq arasında heç bir fərq yoxdur. Qarşıdakı matçlarda bizi yalnız 3 xal qane edir. 0:0 oynamağın anlamı qalmayıb”. (klub saytı)
