Aslan Kərimov: Kubokun finalında Qarabağla Qəbələ qarşılaşacaq

Azərbaycan yığmasının sabiq kapitanı Aslan Kərimovun azerisport.az saytına müsahibəsi

- "Neftçi" indiki vəziyyətinə görə "Xəzər Lənkəran" səddinə ilişə bilər?
- Bu mərhələdə kubok görüşləri iki oyundan ibarət olur. Qazonun vəziyəti, Lənkərandakı ajiotaj paytaxt klubunun xeyrinə olmaya bilər. "Neftçi" indi yaxşı vəziyyətdə deyil. Amma nəzərə almaq lazımdır ki, "Xəzər Lənkəran" ondan da pis vəziyyətdədir. Bakılılar ilk oyunda ilişə bilərlər, amma cavab matçında "Neftçi"nin mərhələ adlamaq şansı daha çoxdur.

- "Qarabağ" "Sumqayıt"ı çətinlik çəkmədən keçə biləcək?
- Bu komandalar Premyer Liqada qarşılaşsaydılar, asanlıqla proqnoz vermək olardı. Amma burada variant yoxdur. "Azərsun Arena"da vuracağı qol "Sumqayıt" üçün cavab matçında əla şans yaradacaq. Bu komandada qol vurmağı bacaran futbolçular var. Amma şübhəsiz ki, cütün favoriti "Qarabağ"dır.

- "Rəvan" "İnter"lə oyunda sürprizə imza ata bilər?
- Burada da birmənalı olaraq, "İnter" favoritdir. İki oyunun nəticəsinə görə, böyük ehtimalla məhz bu komanda mərhələ adlayacaq. Bu komandada "Qarabağ"la oyundan sonra əhval-ruhiyyənin daha da yaxşılaşdığı şübhəsizdir. Problemləri də demək olar ki, həll olunub. Bu "İnter" mövsümün əvvəlindəki bədbin komanda deyil.

- "Zirə" - "Qəbələ" cütü ilə bağlı nə deyə bilərsiniz?
- Burada şanslar bərabərdir. Amma müəyyən nüanslar var. "Qəbələ" kubok oyunlarında daha yaxşı təsir bağışlayır. Bunu cari mövsümdə avrokuboklardakı çıxışı ilə də sübut edib. Təcrübə də bu komandanın tərəfindədir. Ona görə debütantın mərhələ keçməməsi mümkündür.

- Sizcə, Gəncədə keçirilməsi planlaşdırılan finalda hansı komandaları görə bilərik?
- Gəncə şəhər stadionunun qısa zamanda qaydaya salınacağını təsəvvür etmək çox çətindir. Finala gəlincə, mən həlledici oyunda "Qarabağ"la "Qəbələ"ni görürəm.